
ZƏFƏR YÜRÜŞÜ
Valentin XRİSTOV: "Dünya birinciliyində məni nə gözlədiyini yaxşı bilirəm"
Müəllif: Sənan ŞƏFİZADƏ Bakı
Ağır atletika üzrə yığma komandamız uzun müddət azarkeşləri sevindirə bilmirdi. Nəhayət, ötən il Türkiyədə keçirilən Avropa Çempionatında komandamız tarixi nəticəyə imza atdı. Ardınca London Yay Olimpiya oyunlarında ağır atletika tarixində ilk medalımızı qazandıq. Bu yaxınlarda Albaniyada baş tutan qitə birinciliyi də atletlərimizin zəfəriylə yekunlaşdı. Tiranadan komandamız iki qızıl, iki gümüş və bir bürünc medalla qayıtdı.
Sirr deyil ki, yığmanın lideri Valentin Xristova daha böyük ümidlər bəslənilir. İkiqat Avropa çempionu son qitə birinciliyində 8 rekordu təzələdi. Üstəlik, olimpiadada bu idman növü üzrə qazanılan yeganə medalımızın da sahibi Xristovdur. Tiranadan qayıdan gənc idmançımız Region Plus-a müsahibəsində yarış barədə və gələcək planlarından danışdı.
- İlk olaraq, sizi ikinci dəfə Avropa Çempionatında qələbə qazanmağınız münasibətiylə təbrik edirik. Təəssüratlarınızı bilmək maraqlı olardı...
- Albaniyaya qızıl medal üçün yollanmışdım. İstəyirdim maksimum nəticə qazanım. Sevinirəm ki, növbəti dəfə Bakıya çempion kimi qayıtdım. Bu, aylarla gərgin məşqlərimizin nəticəsidir. Komandada olan mehribançılıq uğurumuzun əsas sirlərindəndir. Tiranada güclü rəqabət hiss etmədim. Elə yaxşı hazırlaşmışdım ki, rəqiblərin mənə çatmalarına heç bir şansı yox idi.
- İkiqat Avropa çempionu özünü necə hiss edir?
- Qitənin bütün ikiqat çempionları kimi. Avropada birinci olmaq asan deyil. Amma mənim arzum dünya və olimpiya çempionu olmaqdır. Sözsüz ki, qitə çempionluğu da vacibdir. Bundan sonra, istirahət etməyə vaxtım olmayacaq. 15 gündən sonra gənclər arasında dünya birinciliyi başlayır. Orada yaxşı çıxış etmək üçün gərgin məşqləri davam etdirmək lazımdır.
- Əlbəttə, dünya birinciliyi Avropa Çempionatından çox fərqlənir...
- Sizinlə tam razıyam. Avropa Çempionatında Asiya güclü idmançılarla təmsil olunmur, Dünya Çempionatında isə Çin atletləri də iştirak edəcək. Onlar hər bir çəkidə favorit sayılır. Odur ki, dünya birinciliyində rəqabət böyükdür. Əminəm ki, məşqlərdə yaxşı hazırlaşsam, istəyimə çatacam. Gənclərin dünya birinciliyində qızıl medal qazanmaq əsas məqsədimdir.
- Albaniyada 8 rekordu təzələdiniz...
- Ağırlığı qaldıranda məqsədim rəqiblərdən irəli keçmək idi. Rekordlar barədə sonradan xəbər tutdum. Rekordları təzələmək yaxşı haldır. Daha bir rekordu dünya birinciliyində yeniləyəcəm. Həmin yarışa ciddi hazırlaşıram. Təkanlaqaldırmada rəqiblərdən daha çox ağırlığı sifariş etməyi planlaşdırıram.
- Avropa Çempionatında, demək olar ki, sənə layiqli rəqib olmadı. Amma dünya birinciliyində belə olmayacaq. Sən güclü rəqabətə hazırsanmı?
- Dünya birinciliyində məni nə gözlədiyini yaxşı bilirəm. Dünya birinciliyində ən güclü gənclər təmsil olunacaq. Yəqin, Albaniyadakı uğurdan sonra mənim haqda kifayət qədər məlumat toplayıblar. Bəzi rəqiblər xüsusi əzmlə mənə qarşı hazırlaşacaq. Birinciliyin çətin olacağını bilirəm və rəqabətə hazıram. General olmaq istəməyən əsgərlərdən deyiləm. Mən həmişə qarşıma böyük məqsədlər qoymuşam.
- Komanda yoldaşlarınızın çıxışını necə qiymətləndirirsiniz?
- Azərbaycan millisi yüksək səviyyədə çıxış etdi. Qazanılan nəticə uzun müddət yaddaşlarda qalacaq. İntiqam Zairov, Sərdar Həsənov, Zülfüqar Süleymanov ümidləri layiqincə doğrultdu. Xüsusilə Zülfüqarı qeyd etmək istərdim. Çünki üç ildir böyük yarışlarda iştirak etmir (Zülfüqar diskvalifikasiya edilmişdi - müəllif). Atlet üçün yarışda iştirak etməmək böyük zərbədir - həm hazırlıq, həm də psixoloji tərəfdən. Amma Zülfüqar çətinliklərlə layiqincə mübarizə apardı.
- Avropa Çempionatı sizin üçün sınaq oldu. Bu yarışda 62 kq-da çıxış etməyinizi nəzərdə tuturam....
- Düz qeyd etdiniz. Əvvəlki yarışlarda 56 kq-da mübarizə aparmışam. Amma 62 kq da mənə yad deyildi. Uzun müddətdir bu kateqoriyaya hazırlaşırdım. London olimpiadasından sonra çəkimi dəyişəcəyim dəqiq idi. Avropa Çempionatında qələbə qazanmağım göstərdi ki, 62 kq-da da uğur mənimlə ola bilər. Əsas məşq etməkdir. İdmançı məşqlərdə çox güc itirirsə, deməli, düz yoldadır.
- Zülfüqar Süleymanov da 62 kq-da yarışır. Bu mənada kim yığmanın əsas idmançısı sayılacaq...
- Ağır atletikada bir çəkidə iki idmançının olması normal haldır. Bu o deməkdir ki, ikimiz də istənilən vaxt yığmanın şərəfini qoruya bilərik. Süleymanov səviyyəli idmançıdır. Mən də, o da rəqabətdən çəkinmirik. Bizim aramızda ədalətli rəqabət ola bilər. Hər ikimiz millinin uğuru üçün çalışırıq.
- Qitə birinciliyində uğur qazanmağınıza doğma bolqarlar necə münasibət bəslədi?
- Onlar məni təbrik etdilər. Yarışda tanıdığım bütün insanlar məni təbrik edərək qarşıdakı yarışlarda uğurlar arzuladılar. Bolqarıstan komandası da həmçinin.
- Bolqar mətbuatı sizin Azərbaycan yığmasının şərəfini qorumağınızı xüsusi qısqanclıqla vurğulayır. Bu barədə nə deyə bilərsiniz?
- Bolqarıstanda bəziləri heç cür barışa bilmirlər ki, mən Azərbaycanın şərəfini qoruyuram. Amma mən həmişə demişəm ki, idmançı üçün əsas yaradılan şəraitdir. Özünüz fikirləşin, əgər məşq etməsəm, necə qələbə qazanaram. Azərbaycanda idmana dövlət səviyyəsində qayğı var. Mənə burda ideal şərait yaradılıb. Gənc yaşımda böyük yarışlarda qələbə qazanmaq istəyirəm. Bolqarıstanda idmana bu səviyyədə diqqət yoxdur. Londonda bürünc medal qazananda onlar peşman oldular. Böyük fəxrlə Azərbaycan yığmasının şərəfini qoruyacam.
- Olimpiadayla bağlı arzun hələ də həyata keçməyib...
- Avropa Çempionatından sonra əvvəlcə gənclər, sonra böyüklər arasında dünyanın ən güclüsü olmaq istərdim. Ən böyük arzum olimpiadada çempion olmaqdır. Londonda bürünc qazananda çox sevinmişdim. Növbəti olimpiadaya daha yaxşı formada yollanacam. Çox istərdim arzuma çatım. Nə baş verəcəyini proqnozlaşdırmaq mümkün deyil. 2016-cı ilə hələ çox var.
MƏSLƏHƏT GÖR: