FİNİŞ XƏTTİ

Cari ilin 12-28 iyun tarixlərində Bakıda keçiriləcək ilk Avropa Oyunlarına hazırlıq əsas mərhələyə qədəm qoyur. Artıq yarışların keçiriləcəyi idman qurğularında tikinti işləri başa çatır və iştirakçı ölkələr yarışda mübarizə aparacaq idmançıların sayını təşkilat komitəsinə göndərməyə başlayır. 

Avropa Oyunlarının başlanğıcına 100 gün qalmış mükafatçılara veriləcək medallar da ictimaiyyətə təqdim olunub. Orijinal üslubu ilə seçilən qızıl, gümüş və bürünc medalların üzərində dekorativ Bakı 2015 brendinə uyğun şəkildə hazırlanan unikal təsvirlər əks olunub. Mərkəzində Bakı 2015 loqotipi olan tərtibat dinamik, heyrətamiz və zəngin mədəniyyətə malik ev sahibi şəhərin metaforasıdır. Medalın əks tərəfi isə Avropa Olimpiya Komitəsinin emblemini və mətn simvolunu əks etdirir. 

Medalların tərtibatı Soçi 2014 Qış Olimpiya və Paralimpiya Oyunlarının medallarını hazırlayan məşhur zərgərlik brendi "Adamas"la azərbaycanlı rəssam Nərgiz Hüseynovaya məxsusdur. Medallar "Azərsuvenir" şirkəti tərəfindən Azərbaycanda istehsal ediləcək. 

"Avrooyunlara son 100 gün qalmış medalların bədii tərtibatının təqdimatını, qitənin ən güclü idmançılarının Bakıda çıxışını gözləmək çox həyəcanlıdır", - deyə "Bakı-2015" Avrooyunların Əməliyyat Komitəsinin direktoru Saymon Kleq bildirib. 

Gənclər və idman naziri və Bakı 2015 Oyunlarının baş icraçı direktoru Azad Rəhimov jurnalistlərə açıqlamasında təqdim olunan medallardan razı qaldığını bildirib: "Oyunların başlamasına, sadəcə, 90 gündən bir qədər artıq qalıb və mən əminəm ki, bu möhtəşəm medallar idmançılara ilham verəcək və iyunda baş tutacaq yarışlara gerisayımın başladığı bir müddətdə ictimaiyyətin marağını daha da artıracaq". 

Bakı 2015 həm də birinci Avropa Oyunları üçün bilet siyasətinə aydınlıq gətirib. Böyüklər üçün idman yarışlarına biletlərin qiyməti yarışın raundu, oturacaq kateqoriyası və məkandan asılı olaraq 2-5 manat təşkil edəcək. Şəxsiyyəti təsdiq edən sənədləri və biletləri olan böyüklərin (18 yaş və ondan yuxarı) himayəsində olan uşaqlar və 16 yaşadək yeniyetmələr əksər yarış məkanlarına pulsuz giriş əldə edəcəklər. Lakin Heydər Əliyev adına İdman Arenasında və Milli Gimnastika Arenasında keçirilən yarışlar istisna təşkil edəcək, burada 16 yaşadək şəxslər üçün biletlər 1 manat olacaq. Açılış mərasimi üçün biletin qiyməti 20 manatdan, bağlanış mərasimi ücün 10 manatdan başlayacaq. Biletlərin martın 19-dan etibarən satışa çıxarılması planlaşdırılır.

Bakı 2015 Əməliyyat Komitəsi Avropa Oyunlarının Polşada yayımını təmin etmək üçün "Polsat" idman kanalı ilə saziş imzalayıb. Sazişə əsasən, Polşanın ən böyük özəl televiziya şəbəkəsi olan Polsat Avropa Oyunlarını hər gün azı altı saat müddətində, o cümlədən, gündəlik əsas məqamları yayımlayacaq. Möhtəşəm açılış və bağlanış mərasimləri canlı nümayiş etdiriləcək. 

Polşa Milli Olimpiya Komitəsinin prezidenti Andjey Kraşnitski yerli mətbuata açıqlamasında böyük həvəslə Bakıya gələcəklərini bildirib: "Avropa Oyunları idman dünyasında mühüm bir hadisədir və ən az 12 idman növü üzrə idmançılara Olimpiya Oyunlarına təsnifat imkanı verəcək. Avropa Oyunları polşalı idmançıların beynəlxalq arenada mübarizə aparması üçün mükəmməl imkandır və Polsat kanal vasitəsilə bu cür tədbiri yayımlanacağı xəbərini duymaq çox xoşdur".

Bakı 2015 Avropa Oyunları irlandiyalı boksçu Keti Teyloru tarixdə ilk dəfə bu yay keçiriləcək Oyunların beynəlxalq idman elçisi elan edib. London 2012 Olimpiya Oyunlarında qızıl medal qazanan xanım Teylor, həmçinin 60 kq çəki kateqoriyasında beş ardıcıl dünya çempionu, altı ardıcıl Avropa çempionu və beş Avropa İttifaqı qızıl medalı olmaqla 17 qızıl medal daxildir və Teylor qadın boksu tarixində ən çox medal qazanmış idmançı hesab edilir.

Bakı 2015-in idman elçiləri həm yarışdıqları idman növünü təmsil edəcəklər, həm də Avropa Oyunlarının təşviqi məqsədilə bütövlükdə qitə üzrə və sosial mediada marketinq kampaniyalarında iştirak edəcəklər.

Bir qismi yaxın gələcəkdə açıqlanacaq Bakı 2015 idman elçiləri sırasına xanım Teylorla yanaşı, britaniyalı taekvondoçu Ceyd Cons, fransalı bədii gimnast Kseniya Mustafayeva, danimarkalı kanoe sprintçi Rene Holten Poulsen, serbiyalı basketbolçular Duşan Domoviç Bulut, Marko Saviç, Marko Zdero və Deyan Maystoroviç daxildir.

Qeyd edək ki, yaxın günlərdə Avropa Oyunlarının açılış mərasiminin məşqlərinə start veriləcək. 6000-ə yaxın könüllünün iştirak edəcəyi möhtəşəm mərasimdə Azərbaycan incəsənəti, mədəniyyətinin və nailiyyətlərinin ən böyük uğurları nümayiş etdiriləcək. Mərasim iyunun 12-də saat 20-də start götürəcək.