DÖRDÜNCÜ NƏTİCƏ

Azərbaycanda uğurla keçirilən IV İslam Həmrəyliyi Oyunlarından 5 il ötür. Ölkəmiz həmin yarışda 162 medal qazanmışdı (75 qızıl, 50 gümüş və 37 bürünc). 2022-ci ildə isə İslamiada qardaş Türkiyənin Konya şəhərində keçirilib.

V İslam Həmrəyliyi Oyunları 2021-ci ildə keçirilməli idi. Lakin İslamiada koronavirus pandemiyası üzündən təxirə salınıb. Növbəti İslam Həmrəyliyi Oyunlarının Türkiyənin qədim şəhərlərindən biri olan Konyada keçirilməsi təsadüfi deyil. Asiya ilə Avropa arasında körpü rolunu oynayan Konya bir çox mədəniyyətlərin beşiyi olub. Qədim tarixi olan Konya həm də islam sivilizasiyasının mühüm mərkəzlərindən sayılır. Böyük təsəvvüf şairlərindən olan Cəlaləddin Ruminin türbəsi isə zahidlər üçün ziyarətgahdır.

Qeyd etmək istərdim ki, Bakıdan fərqli olaraq, Konyadakı yarışda oyun proqramında ciddi dəyişiklik edilib. Yeni idman növləri köhnələri əvəzləyib. Azərbaycanın bəzi idman növlərində əsas heyətlə yollanmadığını qeyd etmək yerinə düşər. Buna səbəb cüdo, güləş kimi idman növlərində növbəti ay dünya çempionatının keçirilməsi idi. Yəni federasiyalar əsas heyəti məhz dünya çempionatı üçün qorumaq seçiminin üzərində dayanıb.

İslam Həmrəylik Oyunlarının təntənəli açılış mərasimində Türkiyə Prezidenti Rəcəb Tayyib Ərdoğan, Azərbaycan Prezidenti İlham Əliyev, birinci vitse-prezident Mehriban Əliyeva və digər rəsmi şəxslər iştirak ediblər. Azərbaycan idmançıları ölkələrin paradı zamanı tamaşaçılar tərəfindən böyük coşqu ilə qarşılanıb.

54 ölkə arasında

Ümumilikdə, Azərbaycanı İslamiadada 281 idmançı təmsil edib. Belə ki, Türkiyədən sonra ölkəmiz ən böyük nümayəndə heyəti ilə təmsil olunub. Azərbaycan idmançıları ağır atletika, atıcılıq, atletika, basketbol 3x3 (qadınlar və kişilər), cüdo, futbol, güləş, gimnastika, aerobika, həndbol (qadınlar və kişilər), karate və s. yarışlarda iştirak ediblər. 15 günlük yarışların sonunda Azərbaycan idmançıları V İslam Həmrəyliyi Oyunlarını 99 medalla 4-cü sırada başa vurub. Medallardan 29-u qızıl, 36-sı gümüş, 34-ü isə bürüncdür. Xatırladaq ki, İslamiadada 54 ölkədən 4 mindən çox atlet idmanın 24 növü üzrə 483 dəst medal uğrunda mübarizə aparıb.

Azərbaycan komandasında medal sayına gürə ilk sırada güləşçilər dayanır. Pəhləvanlarımız 23 medala layiq görülüb, onlardan 8-i qızıl medaldır. İkinci yerdə gimnastika nümayəndələridir. Üç növ gimnastikada idmançılarımız cəmdə 17 medal qazanıb, onlardan 8-i qızıl medal olub. Üçüncü yerdə qeyri-Olimpiya idman növünün – kikboksinqin idmançılarıdır. Onlar 3-ü qızıl olmaqla 15 medal qazanıblar.

“Qızıl” adlar

Konyada V İslam Həmrəyliyi Oyunlarında xüsusilə fərqlənən idmançıların adlarını sadalamaq istərdim: güləşdə Mariya Stadnik, Leyla Qurbanova, Jalə Əliyeva, Eldəniz Əzizli, Həsrət Cəfərov, Rafik Hüseynov, Hacı Əliyev, Turan Bayramov. Kikboksçular arasında Anar Məmmədov, Fərid Ağamoğlanov, Bəhram Rəcəbzadə və Balabəy Ağayevin uğurlu çıxışlarını qeyd etməliyik. Karatedə İrina Zaretska, taekvondoda Fəridə Əzizova, atletikada Anna Skidan, üzgüçülükdə Ramil Vəlizadə, stend atıcılığında Nurlana Cəfərova və Cavid Həsənov fərqləniblər. Basketbol üzrə qadın yığmamız da ən yüksək əyarlı medala layiq görülüb.

Gimnastlarımızın çıxışını xüsusilə qeyd etmək lazımdır. Belə ki, fərdi bədii gimnastika proqramında qüvvəsini sınayan Zöhrə Ağamirova qızıl (lent və gürzlər), gümüş (halqa) və bürünc (top) medallar qazanıb. Güllü Ağalarzadə, Ləman Əlimuradova, Kamilla Əliyeva, Zeynəb Hümmətova, Yelizaveta Luzan və Darya Sorokinadan ibarət bədii gimnastika üzrə qrup hərəkətləri komandamız isə 3 lent və 2 topla qızıl, 5 halqa ilə gümüş medala layiq görülüb. Fərdi proqramda finalda çıxış edən təmsilçimiz İlona Zeynalova gürzlərlə 4-cü, lentlə 6-cı olub. Alina Gözəlova isə topla 4-cü, halqa ilə çıxışına görə 7-ci yeri tutub. Ümumilikdə bədii gimnastika üzrə Azərbaycan milli komandasının üzvləri V İslam Həmrəyliyi Oyunlarını 8 medalla (5 qızıl, 2 gümüş, 1 bürünc) başa vurub.

Aerobika gimnastikası üzrə idmançılar da uğurlu çıxışları ilə yadda qalıblar. Belə ki, fərdi proqramla çıxış edən Vladimir Dolmatov qızıl, Mədinə Mustafayeva isə gümüş medal qazanıb. Üstəlik, bütün rəqiblərini qabaqlayan Vladimir və Mədinə qarışıq cütlüklər arasında çempion olublar. Bundan başqa, Xoşqədəm Quliyeva, Mədinə Mustafayeva və Vladimir Dolmatov üçlük tərkibində gümüş medal qazanıblar.

Beləliklə, gimnastikanın bu növü üzrə komandamızın üzvləri İslamiadanı 5 medalla (2 qızıl və 3 gümüş) başa vurub. Ümumilikdə, Azərbaycan gimnastlarının V İslam Həmrəyliyi Oyunlarında qazandıqları medalların sayı 17-yə (8-7-2) çatıb.

Prezidentin yüksək qiyməti

Azərbaycan Prezidenti İlham Əliyev və xanımı Mehriban Əliyeva Bakıda V İslam Həmrəyliyi Oyunlarında medal qazanan idmançılarla görüşüb. Prezident İlham Əliyev idmançıların nəticəsindən razı qaldığını bildirib: “Konyadan Vətənə qayıtmısınız, böyük qələbə ilə qayıtmısınız. Ölkəmizin idman şöhrətini bir daha yüksəklərə qaldırmısınız. Bu münasibətlə sizi ürəkdən təbrik edirəm və əldə edilmiş nailiyyətlərlə bağlı sizə öz təşəkkürümü bildirmək istəyirəm. Əminəm ki, Azərbaycan xalqı sizinlə fəxr edir. Çünki bütün dünyaya bir daha göstərmisiniz ki, Azərbaycan idman ölkəsidir, Azərbaycan idmançıları öz gücü ilə seçilən idmançılardır. V İslam Həmrəyliyi Oyunlarında dördüncü yerə layiq görülmək çox böyük nailiyyətdir. Bu nailiyyət onu göstərir ki, bizim əvvəlki uğurlarımız təsadüfi xarakter daşımırdı”.

Qeyd edəki, Prezident İlham Əliyev idmançıları, onların məşqçiləri və idmançıların oyunlara hazırlığı prosesində iştirak etmiş digər mütəxəssislərin mükafatlandırılması üçün Azərbaycan Respublikasının 2022-ci il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Azərbaycan Respublikasının Gənclər və İdman Nazirliyinə 10 milyon manat vəsait ayrılması barədə sərəncam imzalayıb.