GÜLƏŞÇİLƏRİN ALBANİYA ZƏFƏRİ

Azərbaycanın ən çox sevilən idman növlərindən biri güləş üzrə yeniyetmələrdən ibarət yığma komanda növbəti dəfə Avropa çempionatında layiqli çıxışı ilə yadda qalıb. Albaniyanın paytaxtı Tiranada təşkil edilən güləş üzrə yeniyetmələrin Avropa çempionatında 14 medalla əvvəlki uğurların təsadüfi olmadığını göstərib.

Layiqli nəticə

Yunan-Roma güləşi üzrə millimiz qitə çempionatında 1 qızıl, 5 bürünc medal qazanıb və 118 xalla komanda hesabında 2-ci yeri tutub. Turan Daşdəmirov (45 kq) qızıl, Elnar Ziyadov (48 kq), Əli Seyidəlili (51 kq), Ayxan Cavadov (55 kq), Elmin Əliyev (80 kq) və Mahir Qurbanlı (110 kq) bürünc medala layiq görülüb. Qız güləşçilərdən yalnız Ruzanna Məmmədova (57 kq) gümüş medal əldə edib.

Beləliklə, klassiklərin əldə etdiyi nəticə yaxşı qiymətləndirilə bilər. Əksər çəkilərdə layiqli müqavimət göstərən idmançılarımız həm də əzmkar mübarizə sərgiləyiblər. 45 kq-da çıxış edən Turan Daşdəmirovun çıxışı barədə xüsusi olaraq danışmaq lazımdır. Bütün görüşlərini yüksək səviyyədə keçirən güləşçi yaxşı texnika və çeviklik sərgiləyib. Ayxan Cavadov və Elmin Əliyevin bürünc medalları da müsbət nəticədir. Hər iki güləşçi stabil mübarizə göstərməyə çalışıblar.

Sərbəst güləş üzrə yığmamız da Avropa çempionatında yüksək nəticə əldə edib. Milli 155 xalla komanda hesabında 2-ci, medalların əyarına görə isə 1-ci yeri tutub. Millimiz AÇ-də 4 qızıl və 3 bürünc medalla məşqçilərin ümidini doğruldub. Cəfər Cəfərov (45 kq), Hacı Kərimov (55 kq), Camal Abbasov (60 kq) və Yusif Dursunov (110 kq) Avropa çempionu olub. Ceyhun Əlizadə (51 kq), Mirzəağa Axundov (65 kq) və İsmayıl Rəhimli (71 kq) isə üçüncü yerlə kifayətlənib. Bir komandada 4 idmançının qızıl medal qazanması gərgin məşqlərin və düzgün seleksiyanın bəhrəsidir.

Şəhidlərə həsr olunan uğur

Yeniyetmələrin Avropa çempionatında parlaq nəticə qazanmasına baxmayaraq, bu idmançıların gənclərdə də uğurlu çıxışı üçün məşqçilərin üzərinə böyük məsuliyyət düşür. Sirr deyil ki, yeniyetmələrdə əldə olunan uğurlardan sonra əksər idmançılar rejimi pozur və məşqlərə ciddi yanaşmırlar. Bunun nəticəsində onların əksəriyyəti gənc yaşında karyerasını başa vurur. Buna görə də məşqçi heyəti qızıl medal qazanan güləşçilərin gənclərdən ibarət komandaya keçidini nəzarətdə saxlamalıdır.

Ölkəmizin sərbəst güləş millisinin böyük məşqçisi Əsgərxan Novruzov qitə çempionatındakı uğurdan sonra həm məşqçi heyətinin, həm də güləşçilərin məsuliyyətinin artacağını deyib: “Avropa çempionatındakı uğurumuzu Mübariz İbrahimov başda olmaqla, bütün şəhidlərimizə həsr edirik. Məhz Mübariz İbrahimovun şəhid olduğu günün ildönümündə çempionlarımız Hacı Kərimov və Yusif Dursunov erməni güləşçilərlə  görüşdülər. Əldə olunan nəticə həm məşqçi, həm də idmançıların məsuliyyətini artırır. Biz bundan sonra məşqlərə daha ciddi yanaşmalıyıq.

Ötən il Avropa çempionatından 6 qızıl medalla qayıtmışdıq və komanda hesabında çempion olmuşduq. Hər dəfə bu uğura nail olmaq da mümkün deyil. Üstəlik, bu dəfə Rusiya və Belarus idmançıları yarışa qoşulmuşdular. Yenə də uşaqlar öz güclərini göstərərək, 7 medal qazandılar. Komanda hesabında ikinci yeri tutsaq da, 10 qızıl medaldan 4-nü Azərbaycan idmançıları əldə etdilər”.

Hədəf birinci yerdir

Ə.Novruzov növbəti hədəflərinin Türkiyədə keçiriləcək Dünya çempionatında birinci yeri tutmaq olduğunu əlavə edib: “Bundan sonra Dünya çempionatına hazırlaşacağıq. Yəqin ki, heyətdə dəyişiklik olacaq. Çünki bəzi çəkilərdə zəif güləşənlər oldu. Düzdür, onların hər biri Azərbaycan çempionudur. Yenə də sınaqdan keçirəcəyik. Dünya çempionatında azı bu nəticəni təkrarlamağa və komanda hesabında birinci yeri tutmağa çalışacağıq. İndiyə qədər qitə birinciliyində 3-4 dəfə çempion olsaq da, mundialda bunu reallaşdıra bilməmişik. Uşaqların gücü onu göstərdi ki, komanda bu il İstanbulda dünya çempionu olacaq”.

Albaniyanın paytaxtı Tiranada keçirilən U-17 Avropa çempionatında qızıl medal qazanan Hacı Kərimov (55 kq) uğurunu dünya çempionatında təkrarlamaq arzusunda olduğunu bildirib: “Avropa çempionatında müvafiq olaraq Türkiyə, Rusiya və Fransa idmançılarına qalib gələrək finala yüksəldim. Həlledici görüşdə isə erməni güləşçini məğlub edərək çempion oldum. Qələbəmi şəhidlərimizə həsr edirəm”.

60 kq çəki dərəcəsində ikinci dəfə Avropanın ən yaxşısı olan Camal Abbasov da İstanbulda təşkil olunacaq Dünya çempionatı barədə düşündüyünü söyləyib: “Ötən il Rumıniyanın paytaxtı Buxarestdə Avropa çempionu olmuşdum. Albaniyadakı yarışda da bunu təkrarladım. Bu il yaxşı hazırlıq keçmişik. Dünya çempionatında da öz sözümü demək istəyirəm”.

Gərgin təqvimlə əlaqədar güləş komandaları istirahət etməyəcək. Artıq idmançılar Türkiyədə keçiriləcək Dünya çempionatına hazırlaşır. Mötəbər yarış ərəfəsində heyətdə bir neçə çəkidə dəyişiklik olacağı istisna edilmir.