MESSİNİN BAKI MACƏRALARI

Sözsüz ki, 2024-cü ilin ən unudulmaz hadisələrindən biri əfsanəvi Lionel Messinin Bakıya səfəri oldu. Dünyada futbol tarixinin ən yaxşı hücumçularından biri sayılan argentinalı ulduzun Azərbaycan səfəri bir gündən az davam etməsinə baxmayaraq, yaddaqalan idi.

Unikal Messi

Messinin səfərini maraqlı edən amillərdən biri onun Bakıya ilk gəlişinin olması idi. Məsələn, Messinin futbolda prinsipial rəqibi Kriştiano Ronaldo rəsmi matçlarda iştirak üçün Portuqaliya millisinin heyətində iki dəfə ölkəmizdə qonaq olub və meydana çıxıb. Messinin vətəni Argentina Cənubi Amerika qitəsində seçmə oyunlarda iştirak etdiyinə görə, azərbaycanlı azarkeşlərin onu canlı görmək imkanı olmayıb.

Xatırladaq ki, Messi ən yaxşı futbolçulara təqdim olunan “Qızıl top” mükafatını 8 dəfə qazanan ilk və hələ ki, yeganə futbolçudur, həmçinin Messi Avropada qızıl buts mükafatını 6 dəfə əldə edən ilk futbolçudur.

Messi “Barselona” klubunun heyətində on dəfə İspaniya La Liqasının, altı dəfə İspaniya Kral Kubokunun, beş dəfə İspaniya Superkubokunun, dörd dəfə UEFA Çempionlar Liqasının, üç dəfə UEFA Super Kubokunun və iki dəfə FİFA Klublararası Dünya Kubokunun qalibi olub. Futbolda bütün mümkün titulların sahibi olan Messi 2022-ci ildə Argentina millisi ilə dünya çempionatında qələbə qazanmaqla kolleksiyasında çatışmayan yeganə medalı əldə edib.

Zəngin proqram

Hazırda ABŞ-nin “İnter-Mayami” klubunda çıxış edən Messi daxili çempionat başa çatan kimi istirahət üçün Argentinaya yollanmazdan öncə Azərbaycana gəlib. Birləşmiş Ştatlardan uzun məsafəni qət edən Messini “İnter Mayami”dəki komanda yoldaşları  Luis Suares, Serxio Buskets və Xordi Alba müşayiət edib.

Ölkəmizdəki Messi fanatlarına qonşu Türkiyə və Gürcüstanda yaşayan azarkeşlər də qoşulub. Messiyə görə təcili Bakıya gələn yüzlərlə futbol həvəskarı argentinalının səfər proqramını öyrənmək və ən əsası onunla foto çəkdirmək üçün görüşməyə səy göstərib. Qeyd edək ki, təhlükəsizlik baxımından Lionel Messinin səfər proqramı son ana qədər gizli saxlanılıb.

Dekabrın 11-də Azərbaycana gələn futbol əfsanəsi Lionel Messi və dünya ulduzları Luis Suares, Serxio Buskets və Jordi Alba Bakıdakı Fəxri xiyabanda Ümummilli Lider Heydər Əliyevin məzarını ziyarət edib. Ardınca Bakıda Qarabağ atlarını izləyən ulduz futbolçular Heydər Əliyev Mərkəzində olublar. Heydər Əliyev Mərkəzinin direktoru Anar Ələkbərovla görüşən qonaqlar mərkəzdə təqdim olunan sərgiləri də ziyarət ediblər. Lionel Messi və komanda yoldaşları “Azərbaycan xalçası - ilmələrin rəqsi” adlı xalça kolleksiyası, “Klassik avtomobil sərgisi” və digər ekspozisiyalarla tanış olublar.

Nəhayət, Lionel Messi və dostları Bakı Kristal Zalında futbolsevərlərlə görüşüb. Messi ilə görüş günorta saatları olduğuna görə, çox sayda uşaq məktəb dərslərini buraxmalı olub. Minlərlə futbolsevərin iştirak etdiyi mərasimdə Messi haqqında sənədli filmin nümayişi keçirilib. Messi səhnəyə çıxdığı an minlərlə fanat onu gurultulu alqışlarla qarşılayıb. Tədbirə Bakının uşaq evlərinin sakinləri, sağlamlıq imkanları məhdud uşaqlar və şəhidlərimizin övladları da dəvət olunub. Futbol ulduzları uşaqlarla xatirə fotosu çəkdirib. Daha sonra Messi uşaq futbol komandalarının azarkeşləri ilə söhbət edib və onlara imza ötürməsi ilə zala göndərdiyi avtoqrafı olan futbol topları verib.

Leo ilə görüşə gələnlər arasında müxtəlif yaş təbəqəni görmək mümkün olardı. Əksəriyyət Messinin Argentina millisi və “Barselona”dakı formasını geyinməklə ona olan sevgisini nümayiş etdirməyə can atırdı. Futbol həvəskarları üçün bu idman bayramı məşhur “Morandi” qrupunun çıxışı ilə davam edib.

Messi: “Çox sağ olun!”

Tədbirdə çıxış edən argentinalı ulduz Lionel Messi Azərbaycan xalqına təşəkkür edib: “Hər kəsi salamlayıram. Azərbaycanın mədəniyyəti və insanları ilə tanış oldum. Bu cür isti münasibətə görə təşəkkür edirəm. Dəstəyə görə çox sağ olun”.

Lionel Messinin Bakı səfəri dünyanın aparıcı internet saytlarında işıqlandırılıb. Təşkilatçılardan verilən məlumata görə, Bakı Kristal Zalında Messi ilə görüşdən əldə olunan vəsait xeyriyyə məqsədləri üçün xərclənəcək.

Lionel Messinin Bakı proqramında son dayanacaq İçərişəhərdə yerləşən qədim “Muğam”  restoranı olub. Qonaqlar Azərbaycan mətbəxinin təamlarını dadıb, milli musiqini dinləyiblər.

Bir sözlə, Messinin Azərbaycan paytaxtına 12 saat davam edən səfəri zəngin anlarla yadda qalıb. Və onun Azərbaycandakı minlərlə pərəstişkarı indi onun “Instagram” səhifəsində kumirindən paylaşım gözləyir.