“BÖYÜK DƏBİLQƏ”də 5 MEDAL

Beynəlxalq Cüdo Federasiyasının təqvimində dünya seriyasına daxil olan “Böyük Dəbilqə” turniri Bakıda keçirilib. Fevralın 14-dən 16-dək Azərbaycanın Milli Gimnastika Arenasında dünyanın aparıcı cüdoçuları mübarizə aparıblar.

Yaxşı nəticə və gənclərin sınağı

36 ölkənin təmsil olunduğu “Böyük Dəbilqə” yarışında cüdoçular Paris Yay Olimpiadasından sonra dəyişən yeni qaydalarla mübarizə aparıblar. Üç günlük mötəbər yarışın əsas qəhrəman komandası Yaponiya millisi olub. Bakıya ulduz heyətlə səfər edən yaponlar 17 medalla komanda hesanında birinci yeri tutublar. Xüsusilə qeyd etmək lazımdır ki, 14 çəkidə təşkil edilən yarışın 10 qızıl medalı yapon cüdoçularına qismət olub. Azərbaycan cüdoçuları yarışda biri qızıl, biri gümüş və üçü də bürünc olmaqla ümumilikdə 5 medal qazanıblar. Milli komanda ümumi hesabda yalnız aşkar favorit Yaponiya (10 qızıl, 4 gümüş və 3 bürünc), həmçinin Almaniyadan (1 qızıl, 2 gümüş və 1 bürünc) geri qalaraq üçüncü olub.

Azərbaycan millisi Bakıdakı yarışda liderlər – dünya və olimpiya çempionları Hidayət Heydərov ilə Zelim Kotsoyevə istirahət verib. Heyətdə daha çox gənclərə şans verən Azərbaycan Cüdo Federasiyası layiqli cüdoçuların olduğunu göstərib.

Azərbaycan komandasında Zelim Tçkayev (81 kq) qızıl, Rəşid Məmmədəliyev (73 kq) gümüş, Vüsal Qələndərzadə (73 kq), Əhməd Yusifov (60 kq) və Elşən Əsədov (66 kq) bürünc medala sahib çıxıblar. 32 idmançı ilə təmsil olunmağa rəğmən qazanılan 5 medal qənaətbəxş hesab olunmalıdır. Çünki məşqçi heyəti “Böyük Dəbilqə”də əksər idmançılara təcrübəsini artırmaq imkanı yaradıb.

81 kiloqram çəki dərəcəsində qızıl medal qazanan Zelim Tçkayevin tatamidə göstərdiyi yüksək əzmkarlıq xüsusi qeyd olunmalıdır. İlbəil təcrübəsini artıran Tçkayevin artıq istənilən böyük yarışda medal qazanmaq potensialının olduğu hiss olunur. Finalda minlərlə azarkeşin qarşısında soyuqqanlı mübarizə aparması peşəkar idmançının əsas uğurlarından biri sayılmalıdır. 73 kiloqram çəki dərəcəsində Rəşid Məmmədəliyev isə gümüş medal qazanıb. Həkimlər yarımfinalda zədələnən idmançıya final görüşünə çıxmağa icazə verməyiblər. Buna görə də Rəşid Məmmədəliyev mübarizəsiz gümüş medalla kifayətlənməyə məcbur olub. Vüsal Qələndərzadənin 73 kiloqramda bürünc medala layiq görülməsi millinin bu çəkidə ciddi rəqabət olduğunu növbəti dəfə üzə çıxarıb. Onun bütün görüşlərdə yüksək texnika nümayiş etdirməsi böyük uğurlara yaxın olduğunu sübut edib.

2026-cı ildə keçiriləcək dünya çempionatına hazırlıq

Bakıdakı “Böyük Dəbilqə” turniri paytaxtın 2026-cı ildə keçiriləcək cüdo üzrə dünya çempionatına hazır olduğunu göstərib. 36 ölkədən 300-dən çox idmançı və məşqçi heyəti Azərbaycan Cüdo Federasiyasının təşkilatçılıq işinə yüksək qiymət verib.

Beynəlxalq Cüdo Federasiyasının (IJF) prezidenti Marius Vizer “Region plus”a eksklüziv açıqlamasında təşkilatçılıq barədə danışıb: “Bakıdakı “Böyük Dəbilqə”, həmişəki kimi, çox əla tədbir idi, yüksək səviyyədə və peşəkarcasına təşkil olundu. Medal qazanan azərbaycanlı cüdoçuları təbrik edirəm. 1 qızıl, 1 gümüş və 3 bürünc medal yaxşı nəticədir. Bakıdakı yarış Azərbaycan cüdosunun gücünü nümayiş etdirdi. Azərbaycanın Paris-2024 Yay Olimpiya Oyunlarındakı 2 qızıl medal qazanması təsadüfi deyil. Federasiya son 4 ildə çox böyük işlər görür. Medallardan başqa, Azərbaycanda cüdonun inkişafı naminə həm sosial, həm də təhsil proqramlarının həyata keçirilməsinə nail olub. Növbəti il dünya çempionatının Bakıda keçiriləcəyindən çox məmnunuq. Bu, böyük tədbir və Los-Anceles-2028 Yay Olimpiya Oyunlarına vəsiqə baxımından ilk addım olacaq. Əminəm ki, əla bir yarış alınacaq və həmişəki kimi, ən yüksək səviyyədə təşkil ediləcək”.

Çatışmazlıqlar üzərində işləyəcəyik

Azərbaycan Cüdo Federasiyasının icraçı vitse-prezidenti Rəşad Rəsullu yarışın nəticələrindən razı qaldığını bildirib: “Azərbaycan komandası ümumilikdə orta səviyyədə çıxış etdi. Nəzərə alaq ki, Hidayət Heydərov, Zelim Kotsoyev, Elcan Hacıyev, Turan Bayramov, Vüqar Talıbov, Murad Fətiyev və bir sıra idmançılarımız zədə və müxtəlif səbəblərdən bu yarışda iştirak etmirdilər. Ona görə də əvvəlki illərə nisbətən daha zəif çıxış etdik. Ümumilikdə götürsək, kişilərdən ibarət yığma gözlənilən nəticəni göstərdi. “Böyük Dəbilqə” həm də daha böyük yarışlara hazırlıq üçün sınaqdır. Çatışmazlıqları görürük və növbəti mərhələlərdə onları aradan qaldırmaq üçün işimizi davam etdirəcəyik. Yarışdan sonra məşqçi heyətiylə müzakirələr aparılacaq”.

İcraçı vitse-prezident təşkilatçılığın yüksək səviyyədə olmasının arxasında böyük komanda işi dayandığını söyləyib: “Azərbaycan Cüdo Federasiyasının istər “Böyük Dəbilqə”, istər regional və ölkədaxili, istərsə də digər beynəlxalq səviyyədə yarışları təşkil etmək üçün böyük təcrübəsi var. Bu sahədə çalışan böyük komandamız var. Beynəlxalq Cüdo Federasiyası ilə qarşılıqlı əməkdaşlıq edirik. Qeyd etdiyiniz kimi, federasiya rəsmi saytı vasitəsilə həmişə olduğu kimi ən yaxşı tədbirlərdən birinin keçirildiyini vurğulayıb. Hər il təşkilatçılıq səviyyəsini daha da artırırıq. Bunun arxasında böyük komanda işi dayanır. Təxminən 250-300 insan çalışır. Bu, federasiyanın və tərəfdaş təşkilatların birgə əməyinin nəticəsidir”.

Bir sözlə, Bakıda təşkil olunan “Böyük Dəbilqə” yarışı bu il cüdo üzrə Dünya turunun ikinci turniri olub. Qarşıda təqvimdə “Böyük Dəbilqə”nin daha altı mərhələsi, üç Qran-pri, həmçinin Dünya turunun bir hissəsi olan dünya çempionatı var.