HİDAYƏT HEYDƏROV: “YENİ QAYDALAR BİZİ QORXUTMUR”

Beynəlxalq Cüdo Federasiyası Azərbaycan milli komandasının üzvü Hidayət Heydərovu kişilər arasında “İlin ən yaxşı cüdoçusu” elan edib. Qısa müddət ərzində o, Avropa çempionatının qalibi olub, bundan sonra Dünya Çempionu adına layiq görülüb, daha sonra Parisdə keçirilən Yay Olimpiya Oyunlarında birinci yeri tutub. Məşqçilər 2024-cü ildə bütün mümkün titulların sahibinə idman yarışlarından sonra dincəlmək imkanı veriblər və çempion tətilə yollanıb.

Hidayət Heydərov “Region Plus”a eksklüziv müsahibəsində 2025-ci ildəki planlarından və cüdoda yeni qaydalardan danışıb.

- İstirahətiniz necə keçir?

- Olimpiadadan sonra istirahətə ehtiyac var idi. Yaxınlarımla bir müddət istirahət etdik və yorğunluğu çıxardım. İlin əvvəlindən məşqlərə başlamışam. Tədricən ən yaxşı formamı bərpa etməyə çalışıram. Bu il bir sıra mötəbər yarışlarda iştirak edəcəyəm.

- Fevralın 14-16-da Bakıda təşkil edilən “Böyük Dəbilqə” turnirində iştirak etmədiniz. Səbəbini bilmək olar?

- Məşqçilər heyəti ilə müzakirədən sonra belə qərar qəbul edildi. Apreldə Monteneqroda cüdo üzrə Avropa çempionatı keçiriləcək. Məhz qitə yarışında məni tatamidə izləmək qismətiniz olacaq.

- Dörd dəfə Avropa çempionu olan Hidayət Heydərov Monteneqroya yeni rekord üçün yollanacaq?

- Məqsədim Vətənə növbəti qələbə ilə qayıtmaqdır. Qitə çempionatında dörd dəfə qalib gəlmişəm. Amma yenə eyni həvəslə  yarışa yollanacam. Beşqat Avropa çempionu olmağı arzulayıram.

- 2024-cü ildə bütün titulları qazanan Hidayət Heydərovun həyatında nə dəyişib?

- (gülür) Olimpiadadan sonra daha çox tanındım. İndi insanlar küçədə mənimlə şəkil çəkdirir, hər yerdə salamlaşırlar. Həyatda olimpiya çempionluğunun sevincini yaşayan idmançı çox xoşbəxt sayılır. Artıq mənə qarşı xüsusi hazırlaşırlar. Rəqiblərim olimpiya çempionunu məğlub etməkdən ötrü çalışırlar. Çox istəyərdim ki, zirvədəki yerimi qoruyum.

- Beynəlxalq Cüdo Federasiyası olimpiadadan sonra qaydalarda dəyişiklik edib. Sizcə, bu qaydalar Azərbaycan cüdoçularına problem yarada bilər?

- Mütəxəssislər cüdonun gözəlliyini artırmaq üçün bəzi qaydalara dəyişiklik edib. Əsas məqsəd cüdoçulara ippon fəndini yerinə yetirməyə şərait yaratmaqdır. Azərbaycan cüdoçuları yeni qaydalardan çəkinmir. Yeni qaydalar bizi qorxutmur. Əksinə, daha rahat şəkildə mübarizə aparmaq imkanı verir. Eyni zamanda yeni qaydaları mənimsəmək üçün kifayət qədər vaxtımız var.

- Cüdo əfsanəsi olan 5 qat olimpiya, 12 qat dünya çempionu Teddi Riner hazırda dünyada ən çox bəyəndiyi idmançıların siyahısında birinci sənin adını çəkib. Onunla münasibətiniz var?

- Teddi Riner təkcə cüdo deyil, dünya idmanının canlı əfsanəsidir. Bu adam qələbə qazanmaqdan doymur. Onun kimi ustadın mənim haqqında danışmağı şərəfdir. Biz tanışıq, yarışlarda görüşürük. Müsahibəni tam izləməmişəm, amma onun sözləri mən də xoş hisslər yaratdı. Teddi Riner “dəmir idmançı”dır. İştirak etdiyi turnirlərdə ancaq birinci yeri tutur. Kolleksiyasında medalların sayı həddən artıq çoxdur. Demək, bizi izləyirlər. Azərbaycan idmanının belə təmsil etdiyim üçün qürurluyam.

- Hidayət Heydərovun öz çəkisində əsas rəqibi kimdir?

- Əsas rəqibim özüməm. Bu gün çəkimdə favoritlərdənəm, amma bu barədə düşünməməyə çalışıram. Daha çox məşq edirəm, çünki Los-Ancelesdə keçiriləcək Oyunlarda yaxşı çıxış etmək arzusundayam. Hazırda dünya reytinqində lider olduğumu düşünməməliyəm. Əks halda, məşqlərdə rahat çalışa bilmərəm.

- Azərbaycanda cüdonun inkişafını necə qiymətləndirirsən?

- 2008-ci ildə Elnur Məmmədli Pekin Olimpiadasında qızıl medal qazananda cüdoya böyük axın oldu. Ötən il Azərbaycan cüdoda 2 qızıl medal layiq görüldü. Bu idmanın bu növünün kütləviləşməsinə böyük təkan olacaq. Cüdo klublarının sayı artdı və ən əsası cüdonu daha çox sevməyə başladılar. Bu istiqamətdə Azərbaycan Cüdo Federasiyasının gördüyü işləri də qeyd etməliyəm.

- İdmanda çox nadir insanlar gənc yaşında bütün titullara sahib çıxır. Maraqlıdır bütün medalların olduğu halda indi hansı titulu arzulayırsan?

- İndi çox arzulayıram ki, Avropa çempionu olum. Bəli, dörd dəfə olmuşam. Amma beşinci çempionluq başqa olacaq. Çox istəyirəm ki, ikinci dəfə dünya çempionatında qızıl medal qazanım. Həyatımın əsas məqsədlərindən biri 2028-ci ilin olimpiadasıdır. Həmin olimpiadada yenidən himnimizi səsləndirməyi arzulayıram. İdmançı olaraq titullarımın sayını artırmağı istəyirəm. Bəzən deyirlər ki, azərbaycanlı idmançılar bir dəfə çempion olandan sonra yenidən zirvəyə yüksələ bilmir. Bu fikrin əksini sübut etməyə çalışacam. Fikrimcə, bu, məndə alınacaq. Şəxsimə göstərilən bütün diqqətə görə təşəkkür edirəm. Bəzən hamıyla ünsiyyət alınmır, amma vaxt azlığını unutmamalıyıq. Hamının diqqəti, dəstəyi mənə əzizdir, önəmlidir. Çalışacam xalqımızın sevgisini hər zaman doğruldum.