“QARABAĞ” “ÇELSİ”Nİ ŞOKA SALIR

İngilis futbol azarkeşləri artıq 60 ildir ki, Azərbaycan futboluna xüsusi minnətdarlıq hissi bəsləyirlər. Bunun səbəbi 1966-cı ildə baş vermiş tarixi hadisədir. O zaman dünya çempionatının finalında İngiltərə və Almaniya yığmaları qarşılaşırdı. Azərbaycanlı hakim Tofiq Bəhramovun qətiyyəti sayəsində İngiltərə yığması ilk və hələlik sonuncu dəfə dünya çempionu olub.

Xarakterin milyardlardan daha dəyərli olduğu zaman

Sirr deyil ki, ingilis klubları dünyanın ən güclü çempionatlarından birini – “Premyer Liqa”nı təmsil edirlər və ənənəvi olaraq digərlərinə yuxarıdan aşağı baxırlar. Cari Çempionlar Liqasının qrup mərhələsinin püşkatması keçirilən zaman bu fakt yenidən təsdiqlənib. Rəqib olaraq “Qarabağ”la qarşılaşacağını bildikdən sonra “Çelsi” Azərbaycan klubunun oyununu təhlil etmək əvəzinə, Londonun Bakıdan 4000 km məsafədə olması barədə mülahizələr yürütməyə başlayıb.

 Daha sonra qonaqların səfər proqramı Azərbaycan azarkeşlərini təəccübləndirib: uzaq yolu əsas gətirərək, klub Bakıda məşq keçirməyəcəyini bildirib. Hətta mətbuat konfransının belə, onlayn keçirilməsinə qərar verilib: baş məşqçi Enzo Mareska yerli jurnalistlərin suallarını Londonda qalaraq cavablandırıb.

“Qarabağ” heç vaxt ingilis klubları üzərində qələbə qazanmayıb. Bu səbəbdən əksər ekspertlər “aristokratlar”ın (azarkeşlərin “Çelsi”yə verdikləri ad) Bakıda asan qələbəsini proqnozlaşdırırdılar. Lakin Qurban Qurbanovun komandası xarakter və taktiki baxımdan yetkinlik nümayiş etdirərək rəqibi şoka salıb. Nəticədə londonlular Bakıdan yalnız bir xal aparmaqla kifayətlənmək məcburiyyətində qalıblar.

Səkkiz il əvvəl “Qarabağ” ilk dəfə Çempionlar Liqasının qrup mərhələsinə çıxan zaman rəqiblərindən biri yenə də “Çelsi” idi. O zaman ingilislər 6:0 və 4:0 hesabları ilə qələbə qazanmışdı. Cari matçdan əvvəl klub hətta sosial şəbəkələrdə həmin oyunların videosunu paylaşmışdı: görünür, tarixin təkrarlanacağına işarə edirmişlər.

Əlbəttə ki, böyük futbol böyük pul deməkdir. Dünya səviyyəli klub olmaq üçün, ilk növbədə, maliyyə potensialı vacibdir. “Qarabağ”ın bazar dəyəri 24 milyon avro olaraq qiymətləndirilir, “Çelsi”nin heyətinin dəyəri isə 1 milyard avrodan çoxdur. Lakin Bakıdakı heç-heçə göstərib ki, maliyyə vəsaiti vacib məsələ olsa da, hər şeyi həll etmir.

İlhamlandırıcı heç-heçə

Çempionlar Liqasının dördüncü turunda ev sahibi olaraq oynadıqları matçda 2:2 hesablı heç-heçə hətta ulduz komandalarla oyunda nəticə əldə etməyin mümkün olduğunu nümayiş etdirib. “Qarabağ” öz fədakarlığı və gücünə inamı ilə Avropa futbolunda yeni standartlar müəyyən edən klub olduğunu təsdiqləyib.

Tofiq Bəhramov adına Respublika Stadionunda 30 min tamaşaçı qarşısında keçirilən oyun əsl bayrama çevrilib. Bakıya ilk dəfə olaraq təxminən 800 qonaq azarkeşi gəlmişdi. “Qarabağ” azarkeşləri, yəni demək olar ki, bütün stadion gec saata baxmayaraq, sonuncu dəqiqəyə qədər sevimli komandalarını dəstəkləyiblər.

Tribunaların dəstəyi mühüm amil olub: azarkeşlərin səs-küyü və təzyiqi londonluların hücumlar qurmasına mane olurdu. Digər əsas məqam Qurban Qurbanovun komandasının cəsarətli, layiqli oyunu idi.

Matçdan əvvəl məşqçi demişdi ki, nəticədən asılı olmayaraq “Qarabağ” artıq qalib sayılır, çünki “Çelsi” kimi rəqiblərin ölkəyə gəlməsi təkcə bir klub üçün deyil, bütün Azərbaycan futbolu üçün əhəmiyyətlidir. Bu dəfə isə “Qarabağ” təkcə mənəvi cəhətdən deyil, oyun baxımından da qələbə qazanıb.

Qurban Qurbanov “Çelsi”yə qarşı müdafiədə oynamağın riskli olduğunu anlayırdı və ilk dəqiqələrdən rəqibə hücum futbolu təklif etdi. Təəccüblənən qonaqlar çaşmadılar və ilk olaraq hesabı açdılar, bundan sonra bir çoxları “Qarabağ”ın məğlub olacağını düşünürdü. Lakin bunun ardınca dəqiq taktiki qərarlar verilib: “Qarabağ”ın oyunçularından biri zədə səbəbindən meydanı tərk etməyə məcbur olsa da, komanda hesabı bərabərləşdirə bilib. Kamilo Duranın zərbəsindən sonra top qapı dirəyindən qayıdıb və Leandru Andrade onu qapıya göndərə bilib - 1:1.

Tezliklə ingilislər daha bir zərbə aldılar. Birinci hissənin sonunda “Çelsi”nin müdafiəçisi cərimə meydançasında əllə oynayıb və hakim dərhal 11 metrlik zərbəyə işarə edib. Marko Yankoviç penaltini inamla reallaşdırıb - 2:1.

Ədalət naminə qeyd etmək lazımdır ki, “Premyer Liqa”nın sıx təqvimi səbəbindən Enzo Mareska bir neçə əsas oyunçusundan yararlana bilməyib: ikisi zədəli idi, digərləri isə çempionatın növbəti turuna hazırlaşaraq İngiltərədə qalmışdılar.

Fasilədən sonra “Çelsi” üç əvəzetmə edib və hesabı bərabərləşdirməyi bacarıb - 2:2. Qalan vaxtda hər iki komandanın qol vurmaq şansları olsa da, hesab dəyişməyib.

Pley-off üçün əla şanslar

Xüsusilə polyak qapıçı Mateuz Kohalskinin, eləcə də Mateus Silva, Emmanuel Addai, Elvin Cəfərquliyev, Kevin Medina və Bəhlul Mustafazadənin yüksək səviyyəli oyununu qeyd etmək lazımdır.

Bakıda “Çelsi” ilə heç-heçədən sonra “Qarabağ” 7 xal toplayaraq 34 komanda arasında 15-ci yeri tutur. Növbəti mərhələyə çıxmaq üçün ən yaxşı 24 komanda arasında yer almaq lazımdır, buna görə qalan dörd oyunda maksimum xal qazanmaq vacibdir.

“Qarabağ” Çempionlar Liqasında növbəti matçı noyabrın 25-də İtaliyada “Napoli”yə qarşı keçirəcək. İtalyan klubu hələlik 4 oyunda cəmi 4 xal toplayıb və qələbəyə can atır. Şayiələrə görə, görüşün nəticəsi Napoli baş məşqçisi Antonio Kontenin taleyini müəyyən edə bilər.