QIŞ MÖCÜZƏLƏR PLANETİ

Hər ilin dekabrda dünya dəyişir: şəhərlər sayrışan işıqlarla örtülür, mağaza vitrinləri nağıl dekorasiyalarına çevrilir, hava şam ağacının ətrinə bürünür. Bunun səbəbi isə bütün dünyada sevilən qış bayramı - Yeni ildir. Yeni il möcüzələr dövrüdür. Bu bayramda təkcə ailə və dostlarla bir araya gəlmək deyil, həm də bayramların xüsusilə parlaq hiss edildiyi yerlərə getmək istəyirsən.

Milad yarmarkaları keçirən rahat Avropa şəhərciklərindən Laplandiya qar kəndlərinə, əlvan rəngli işıqlara bürünmüş meqapolislərin göydələnlərindən ekzotik kurortların günəşli sahillərinə qədər qış macəraları üçün imkanlar sonsuzdur. Biz sizə Yeni ilin əsl sehrə çevrildiyi yerlərdən danışacaq və bayramı unudulmaz etmək üçün məsləhətlər verəcəyik.

Miladın nağıla çevrildiyi yerlər

Bayram ənənələrindən söhbət gedən zaman Almaniya hər zaman lider mövqeləri tutur. Dekabrda onun şəhərləri əsl nağıl kəndlərinə çevrilir: isti şərab ətri ilə zəncəfilli peçenye qoxusunun qarışdığı məşhur “Christkindlesmarkt” (Milad bazarı) ilə Nürnberq və ya unikal yolka bəzəkləri və ənənəvi ştollenləri (keks) tapa biləcəyiniz ən qədim Milad yarmarkası olan “Striezelmarkt” ilə Drezden. Burada Miladı hər bir işıqda, hər bir vitrində və qlintveynlə dolu hər bir fincanda hiss etmək olur, kiçik taxta köşklər isə əsl qış möcüzəsi atmosferi yaradır.

Avstriya - musiqi, qar və qəhvə romantikasıdır. Vyana Milad bazarları ilə heyrətləndirir, burada işıqlar arasında klassik musiqidən, ətirli isti şərabdan və məşhur Vyana ştrudelindən zövq almaq olar. Motsart şəhəri olan Zaltsburq qarlı küçələri, əsas meydandakı yarmarkaları və konsertləri ilə nağıla çevrilir.

Dekabrda Praqa isə sanki canlanmış açıqcadır. Daş səkilər, qədim binalar, qalalar və qüllələr minlərlə işıqla işıqlandırılıb. Köhnə şəhər meydanında isti şərab, ballı peçenye və yerli suvenirlərlə ənənəvi yarmarkalar qurulub. Səhər tezdən Karlov körpüsündə gəzinti isə turistlərin izdihamı olmadan Praqanın sirli gözəlliyini hiss etməyə imkan verir. Çex Miladı orta əsr ab-havasını müasir ənənələrlə birləşdirir: rahat, gözəl və tamamilə nağıl kimidir.

Brüsseldə Milad bayramı yarmarkalar, buz meydançaları və bayram instalyasiyaları ilə müşayiət olunur. Ən məşhur yarmarka şəhərin mərkəzini və Qrand-Plas meydanını tutan “Winter Wonders”dir. Burada hədiyyələr, şirniyyatlar və isti içkilərlə dolu çoxlu taxta köşklər var, axşamlar isə küçələr və binalar minlərlə işıqla işıqlandırılır, qeyri-real atmosfer yaradır. Tarixi binaların fasadlarında, o cümlədən Qrand-Plas və həmçinin bayramın mərkəzinə çevrilən yolka ağacında işıq şouları xüsusilə dərin təəssürat yaradır.

Əsl qış nağılı haqqında xəyal edənlər üçün isə Şimali Avropa unikal təəssüratlar təqdim edir. Finlandiya Laplandiyası - Santa Klausun, maralların və qarlı meşələrin evidir. Burada it arabaları ilə gəzmək, şimal parıltısını görmək və “əsl Santa” ilə görüşmək olar. İsveç və Norveç qarlı mənzərələri, daxmaları və skandinav Milad ənənələrinin sehrini hiss etmək imkanı ilə özünə cəlb edir. Burada Milad sadəcə bayram deyil, hər günü qar və sehrlə dolu olan əsl macəradır.

Yeni ili qarşılayırıq: meqapolislərdən tropiklərə

Bu bayram, demək olar ki, bütün ölkələrdə qeyd olunur, lakin dünyanın hər yerində özünəməxsus xarakter daşıyır. Məsələn, Asiyada Tokio, Seul və Honq Konq öz işıqları və böyük miqyaslı şouları ilə təcrübəli turistləri heyrətləndirir. Tokioda küçələr milyonlarla lampa ilə parlayır, Seulda insanlar fişəng buraxmaq üçün meydanlarda toplaşırlar. Honq Konqda isə “Viktoriya Harbor” adlı sahilyanı ərazi boyunca dünyanın hər yerindən turistləri cəlb edən ən təsirli Yeni il işıq şoularından biri təşkil olunur.

ABŞ-də Milad və Yeni il bayramları xüsusi miqyas alır. Məsələn, Tayms Skver ilə Nyu-York simvola çevrilib - hər il milyonlarla insan burada məşhur kristal şarın enməsini izləmək üçün toplaşır. Çikaqo və San-Fransisko bayram işıqlandırmaları və müxtəlif mədəni proqramlarla insanları heyran edir, yerli ənənələr isə əsl qış karnavalı hissi yaradır.

Bu arada, yeni ili qeyri-adi şəkildə qarşılamaq istəyənlər üçün ekzotik istiqamətlər uyğundur. Maldiv və Seyşel adaları qızılı çimərlikləri, isti dənizi və ulduzlar altında şam yeməklərini təklif edir. Burada Yeni il daha rahat bir mühitdə - əllərdə kokteyllərlə, dalğaların səsi altında və unudulmaz günbatımları ilə qarşılanır.

Dubay Yeni ili lüks və miqyasla qarşılamaq imkanıdır. Böyük atəşfəşanlıqlar, şoular və müasir hotellər, yumşaq iqlim isə hətta qışda da çimərliklə dincəlməyə imkan verir.

Tailandın adaları soyuqdan qaçmaq və bu günləri palma ağacları altında keçirmək istəyənlər üçün ideal variantdır. Tropik adalar, dalğaların səsi və rahat bunqalolar sakit bir mühit yaradır, yerli bazarlar və bayramlar isə parlaq təəssüratlar və ekzotika əlavə edir.

Çin Yeni ili və ya Bahar bayramı Qərb ölkələrindən onunla fərqlənir ki, onun tarixi dəyişir və ay təqviminə uyğun olaraq yanvarın sonu - fevralın əvvəlinə düşür. Ona hazırlıq onun gəlişindən çox əvvəl başlayır: küçələri qırmızı fənərlərlə, mağazaları dekorasiyalarla, evləri isə uğur və xoşbəxtlik üçün simvolik bəzəklərlə bəzəyirlər. Əsas bayram tədbirləri Pekin, Şanxay və Honq Konqda keçirilir. Lakin əsl sehr kiçik şəhərlərdə də hiss edilir, burada küçələrdə əjdaha, aslan və fişənglərlə paradlar keçirilir. Bazarlarda ənənəvi şirniyyatlar, Çin təqviminə görə heyvan fiqurları və müxtəlif növ suvenirlər satılır. Mərkəzi yeri pis ruhları qovmağı və uğur cəlb etməyi simvolizə edən atəşfəşanlıq şousu tutur.

Beləliklə, dünya bayram etmək üçün müxtəlif variantlarla zəngindir: meqapolislərin parlaq işıqlarından sakit qarlı kəndlərə və tropik günəşə qədər. Əsas olan, bu zamanı sizin üçün xüsusi edəcək və uzun müddət xatirələrlə dolduracaq yeri seçməkdir.

Miladın və Yeni ilin heyrətləndirdiyi top 5 yer

Əgər ənənəvi yarmarkalar və meqapolislərdən başqa qeyri-adi bir şey istəyirsinizsə, bayramların qeyri-adi macəraya çevrildiyi istiqamətlərə diqqət yetirmək lazımdır.

Məsələn, Xorvatiyadakı Qrojnyan şəhərciyi. Bu, İstriyanın şimalında yerləşən, qışda gözəl Milad kəndinə çevrilən kiçik Orta əsr şəhərciyidir. Dar daş küçələr, incəsənət qalereyaları və yerli kafelər zamanın dayandığı hissini yaradır. Burada meydanda isti şokolad fincanı ilə rahatca gəzə və əsl Avropa koloriti ilə zövq ala bilərsiniz.

İslandiyanın Reykyavik şəhəri qışda əsl nağıla çevrilir. Bəyaz küçələr, şimal parıltısının işıqları və isti bulaqlar şəhəri qış istirahəti üçün xüsusi edir. Burada Yeni il böyük miqyaslı atəşfəşanlıqlarla qarşılanır, Milad aurası isə rahat evlər və milli ənənələr sayəsində yaranır.

Sloveniyadakı Bled şəhəri isə gölü və qayada yerləşən qalası ilə açıqcadan bir kadr kimi görünür. Qış aylarında burada, demək olar ki, turist olmur, bu da sakit mühitdən zövq almağa imkan verir. Buzlu suda qayıqla gəzmək, qalada gəzintilər və yerli Milad şirniyyatları istirahəti son dərəcə xoş edir.

Yunanıstandakı Santorini bayramı qeyri-adi keçirmək istəyənlər üçün istiqamətdir. Mavi dəniz fonunda ağ evlər, “tavernalar” və mülayim iqlim Yeni ili qarşılamağı çox gözəl edir. Burada bayram mənzərəsi vulkanik günbatımına açılan terrasda qarşılaya bilərsiniz.

ABŞ-dəki Leyk-Plasid aktiv qış istirahəti həvəskarlarına uyğundur. Dağ-xizək kurortları, xizəklə gəzmək, göl kənarında evlər və qarlı meşələr qış möcüzəsi mənzərəsi yaradır. Burada bayramı təmiz havada aktiv istirahətlə birləşdirmək olar.

İdeal qış tətilini necə planlaşdırmaq olar?

Milad və Yeni ili səyahətdə qarşılamağı planlaşdırarkən, istirahətin rahat və yadda qalan olması üçün bir neçə əsas məqama diqqət yetirmək vacibdir. Birincisi, yaşayış yerini və nəqliyyatı əvvəlcədən rezerv etmək lazımdır. Məsələn, Nyu-Yorkda istirahət üçün hotelləri və aviabileti yaydan əvvəl rezerv etmək daha yaxşıdır. Bu, sizə daha aşağı qiymətə başa gələcək və ümumiyyətlə, qalmağa yer tapa biləcəksiniz. Dekabrda və yanvarda bir çox populyar istiqamətlər turistlərlə dolu olur, aviabiletlər və hotellərin qiymətləri isə dəfələrlə arta bilər.

İkincisi, hava və iqlimi nəzərə alın. Əgər qar və Milad nağılı haqqında xəyal edirsinizsə, Şimali və Mərkəzi Avropa şəhərlərini və ya dağ-xizək kurortlarını seçin. Çimərlik Yeni ili üçün Tailand, Maldiv və ya Dubay kimi tropik marşrutlar uyğundur.

Üçüncüsü, yerli ənənələri və bayram tədbirlərini öyrənin. Məsələn, Çin Yeni ili tarix və format baxımından Qərb Yeni ilindən fərqlənir, İslandiya və ya Laplandiyada isə şimal şəfəqini müşahidə etmək və ya it qoşqularında gəzmək kimi unikal fəaliyyətlər ola bilər.

Büdcəni unutmayın: Milad yarmarkaları və bayram tədbirləri ödənişli ola bilər, turist yerlərində restoran hesabları isə qışda orta göstəricidən yüksək ola bilər. Xərcləri əvvəlcədən planlaşdırın və alternativlər axtarın - məsələn, Milad bəzəkli küçələrdə gəzintilər və ya pulsuz küçə şouları.

Azərbaycanlılar bayramları qarşılamaq üçün hara gedirlər?

Azərbaycanlılar Yeni ili həm evdə, həm də xaricdə, ecazkar bayram aurası, rahat logistika və maraqlı istirahət proqramı olan yerləri seçərək qarşılamağı sevirlər. Onlar arasında xüsusilə Türkiyə (İstanbul, Uludağ), Gürcüstan (Tbilisi, Bakuriani və Qudauri), BƏƏ (Dubay), Almaniya (Frankfurt, Berlin, Münhen), Avstriya (Vyana və Zaltsburq), Macarıstan, Rusiya (Moskva və Sankt-Peterburq) və hətta Çin (Pekin və Şanxay) populyardır. İtaliyanın Roma, Neapol, Venesiya, Florensiya və digər məşhur şəhərləri isə bayramı tarix və memarlıqla birləşdirmək istəyənləri cəlb edir.

Dağ-xizək yerləri - Türkiyə, İsveçrə, Fransa və Avstriya - aktiv istirahət sevərlər üçündür. Xizək, snoubord və təmiz havada qış əyləncələri səyahəti zəngin və yadda qalan edir. Yeni ili istidə və dəniz sahilində qarşılamağı sevənlərə Baliyə, populyarlıq qazanan Tailanda, Misirə (Şarm əl-Şeyx) və Sinqapur, Malayziya və İndoneziyaya həftəlik qrup turu təklif olunur. Seçim büdcədən, maraqlardan və bayramın qış ruhunu hiss etmək istəyindən asılıdır: istər Milad yarmarkaları ilə Avropa nağılı, istər palmalar altında çimərlik Yeni ili, istərsə də dostlar və ailə ilə dağ-xizək istirahəti olsun.

Ölkə daxilində Azərbaycan vətəndaşları Yeni il bayramlarını dağ-xizək kurortları – Şahdağ vəTufandağda, tarixi şəhərlərdə (Şəki, Qəbələ), kurort zonalarında (Quba, Naftalan) və ya yarmarkaların və konsert tədbirlərin təşkil olunduğu Bakıda keçirirlər. Bununla, qış istirahətini, təbiəti və mədəni hadisələri birləşdirməyə çalışırlar.

Öz qış nağılını yarat

Yeni il - bayram atmosferinə qərq olmaq üçün sehrli bir zamandır. Dünyamız isə bayramların xüsusilə parlaq hiss edildiyi yerlərlə zəngindir. Hər kəs öz zövqünə görə istiqamət seçə bilər: istər Dubayda böyük miqyaslı şoular, istər Laplandiyada şimal şəfəqi, istər Praqanın köhnə küçələrinin romantikası, istərsə də Tailandda çimərlik Yeni ili.

Əsas olan səyahəti əvvəlcədən planlaşdırmaq, iqlimi, ənənələri və büdcəni nəzərə almaq, həm də harada olmağınızdan – hətta öz evinizdə belə – asılı olmayaraq, bayram əhvali-ruhiyyəsi yaratmağı unutmamaqdır. Qoy, qış bayramlarınız unudulmaz, parlaq emosiyalar, istilik və uzun müddət sizinlə qalacaq təəssüratlarla dolu olsun.