KÖHNƏ HAMAM, KÖHNƏ TAS?

Azərbaycan 2027-ci ildə çox önəmli idman tədbirinə ev sahibliyi edəcək. 20 yaşadək kişilər arasında futbol üzrə dünya çempionatı Özbəkistanla yanaşı, həm də ölkəmizdə təşkil olunacaq. Artıq hazırlıq işlərinə indidən start verilib və yarışın təşkili üçün Təşkilat Komitəsi yaradılıb.

Bakı üçün yeni sınaq

Belə bir çempionatın Azərbaycana salınması ölkənin idman siyasətinin böyük uğurlarından biri kimi qəbul olunur. Mütəxəssislər vurğulayırlar ki, Bakının gələcəkdə də bu cür yarışlara vəsiqə qazanması üçün çempionatı ən yüksək səviyyədə təşkil etmək vacibdir. Üstəlik, ölkəmizin  bu cür yarışları keçirmək təcrübəsi də var. Yaxın keçmişdə futbol üzrə 17 yaşlılar arasında Avropa çempionatı, 17 yaşadək qızlar arasında dünya çempionatı ölkəmizdə təşkil edilib. 2019-cu ildə Avropa Liqasının finalı Bakı Olimpiya Stadionunda keçirilib. Bundan bir il sonra Avropa Çempionatının A qrupunun oyunları, həmçinin 1/4 final mərhələsinin qarşılaşmasını azarkeşlər Azərbaycanda canlı izləyib. Başqa sözlə, Bakının nüfuzlu futbol yarışlarına ev sahibliyi etməklə bağlı zəngin təcrübəsi var.

20 yaşadək futbolçular arasında dünya çempionatı 1977-ci ildən keçirilməyə başlanılıb. Hər iki ildən bir təşkil olunan mundial gələn il 25-ci dəfə baş tutacaq. Yalnız 2021-ci ildə İndoneziyada nəzərdə tutulan yarış əvvəlcə pandemiya səbəbindən 2023-cü ilə təxirə salınıb, daha sonra İsrail yığmasının iştirakı əleyhinə etirazlar üzündən Argentinaya verilib.

Qeyd edək ki, Azərbaycan ikinci dəfə mundiala ev sahibliyi etmiş olacaq. 1985-ci ildə U-20 dünya çempionatı keçmiş SSRİ-də təşkil olunub. Həmin vaxt Özbəkistan təşkilatçı respublikalar sırasında olmasa da, Azərbaycan Tofiq Bəhramov adına Respublika stadionu və Mehdi Hüseynzadə adına Sumqayıt şəhər stadionunu komandaların ixtiyarına verib.

Təşkilatçılıqla yanaşı, Azərbaycan komandasının yarışda layiqli çıxışı önəmlidir. Təəssüf ki, hazırda bu yaş qrupu üçün tamhüquqlu komandamız yoxdur. 19 və 21 yaşlılardan ibarəm seçmə komandaların olmasına rəğmən, 20 yaşlılardan ibarət kollektiv ilk dəfə formalaşdırılacaq. AFFA dünya çempionatında iştirak edəcək komandaya rəhbərlik üçün növbəti dəfə portuqaliyalı məşqçi dəvət edib.

Ötən ilin sentyabrında böyük təzminat aldıqdan sonra Azərbaycanın əsas milli komandasından ayrılan Fernandu Santuşun səs-küylə istefası unudulmayıb. Bu kontekstdə, Portuqaliya millisini Kriştiano Ronaldo ilə birlikdə Avropa Çempionatı tituluna aparan Fernandu Santuşun Azərbaycanda uğur qazana bilmədiyini nəzərə alaraq, başqa bir portuqaliyalı məşqçinin - Rui Jorjenin dəvətini qəbul etmək çətindir. Keçmiş təcrübəni nəzərə alaraq, yeni məşqçidən müsbət nəticə gözləyə bilərikmi?

Eyni zamanda 20 yaşlılardan ibarət Azərbaycan komandasına baş məşqçi təyin olunan Rui Jorjenin tərcümeyi-halı, şübhəsiz ki, diqqətəlayiqdir. Onun Portuqaliya kimi istedadların bol olduğu ölkənin U-21 millisini 15 il çalışdırması çox şeydən xəbər verir. Lakin Portuqaliya kimi futbol ölkəsində istedadlı yeniyetmələr çoxdur, seçim etmək üçün əla şərait var. Azərbaycan futbolunda vəziyyət kökündən fərqlidir.

Əslində, Azərbaycanda istənilən yaş qrupundan olan milli komandalara əcnəbi məşqçiləri dəvət etmək mənasız görünür. Onları istədiyiniz qədər dəyişə bilərsiniz, amma yaxşı oyunçular olmadan heç nəyə nail olmaq mümkün deyil. Rui Jorge, şübhəsiz ki, uzun illər Portuqaliya gənclər komandasında çalışmış ixtisaslı mütəxəssisdir. Lakin kifayət qədər istedad olmadan o, qısa müddət ərzində möcüzələr yarada bilməyəcək. Onun əsas vəzifəsi Əvəzedicilər Liqasında və ya I və II liqalarda oynayan gənc Azərbaycan oyunçuları ilə məşğul olmaq olacaq. Heç bir məşqçi onları iki il ərzində ulduz oyunçulara çevirə bilməyəcək.

Daha əvvəl Azərbaycanın ev sahibliyi etdiyi turnirlərdə baş məşqçilər yerlilər olub və onların işi heç də pis alınmayıb. İslam Həmrəylik Oyunlarının qalibi olan U-21 yığmamızda baş məşqçi Yaşar Vahabzadə idi. 2017-ci ildə komanda yarışın qalibi olmaqla qarşıya qoyulan məqsədə nail olub. İndi fərqli yarış, fərqli hədəf var. Sadəcə əcnəbi məşqçinin qısa müddətdə möcüzə edəcəyinə inanmaq sadəlöhvlükdür.

Rui Jorje: “Uğur oyunçulardan asılıdır”

Azərbaycanın U-20 millisinin yeni baş məşqçisi Ruy Jorje təqdimat mərasimində uğur qazanacağına inandığını bildirib: “Ümid edirəm ki, qarşıdakı 1,7 il ərzində çox yaxşı təcrübə keçə biləcəyik. Uğur idman nəticələrindən asılıdır. Buna nə mən, nə də hansısa məşqçi zəmanət verə bilər. Bir komandada uğur qazanmaq oyunçuların istəyindən, əzmkarlığından asılıdır. Onlar üzərlərində çalışmalıdırlar ki, yüksək səviyyədə çıxış etsinlər. Bunu etsək, uğur qazana bilərik.

Fernandu Santuşla danışıb-danışmadığıma gəlincə, bəli, müqavilə imzalamamışdan öncə həm özü, həm də köməkçiləri ilə danışmışdım. Ölkə və insanlar haqqında çox yaxşı məlumat aldım. İnsanların qonaqpərvərliyindən, rəftarından yaxşı şeylər eşitdim. Azərbaycana gəldiyim ilk gündən gördüm ki, hər şey Santuşun dedikləri ilə üst-üstə düşür.

Mən çox yaxşı başa düşürəm ki, Azərbaycan millisi Portuqaliya millisi deyil və onun oyunçuları Portuqaliyada oynayan oyunçularla eyni deyil. 19 yaşadək futbolçulardan ibarət milli komandanın qrup mərhələsi oyunlarını, sonra isə Sloveniya ilə oyunu izlədim. Əvvəlcə oyunçuların oyun keyfiyyətini yaxşılaşdıracağıq, sonra isə digər aspektlərə keçəcəyik. Bir sistem müəyyənləşdirib planlaşdırılan proqrama uyğun işləməliyik”.

Rui Jorjenin AFFA ilə müqaviləsi bir il yarım müddətinə bağlanıb və onun nəticəsindən asılı olaraq müddətin uzadılması mümkündür. 52 yaşlı mütəxəssis əsasən komandanı gələn il Azərbaycan və Özbəkistanda keçiriləcək Dünya Kubokuna hazırlamaq üçün dəvət olunub. Bundan sonra onun U-20 ilə müqaviləsi başa çata bilər. AFFA rəhbərliyi Rui Jorjeni milli komandanın baş məşqçisi vəzifəsinə potensial namizəd kimi nəzərdən keçirir. Əgər o, gənclər komandasını uğurla məşq etdirərsə, böyüklər komandasına təyin oluna bilər.

Milli komandamız ilk dəfə 2027-ci ildə U-20 Dünya Kubokunda iştirak edəcək.