Müəllif: Sənan ŞƏFİZADƏ Bakı
2015-ci ilin iyununda Azərbaycanın paytaxtı Bakı şəhərində keçiriləcək ilk Avropa Oyunlarının rəsmi loqosu eyni vaxtda Bakı, Roma və Madriddə ictimaiyyətə təqdim edildi.
Azərbaycanlı Adəm Yunisov tərəfindən hazırlanan və açıq ictimai müsabiqə nəticəsində seçilən loqo alov, su, əfsanəvi Simurq quşu, xalı və nar da daxil olmaqla, Azərbaycanın qədim və müasir mədəniyyətini tərənnüm edir.
Adəm Yunisov "R+"a açıqlamasında yaratdığı emblemlə mötəbər yarışın təbliğatına dəstək olmaq istədiyini bildirib: "Mən bununla Azərbaycan xalqının birinci dəfə keçiriləcək Avropa Oyunlarına olan həvəs və istəyini ifadə etmək, fikirdə və idmanda yenilikçi olmaq istədim. Bu həmin ideyanı əks etdirən əlamətdar bir loqodur. Avropa Oyunlarının Bakıda keçirilməsi tarixi hadisə olacaq."
Loqo Romada baş tutan Avropa Olimpiya Komitəsinin 42-ci Ümumi Yığıncağında da təqdim olunub və AOK Prezidenti Patrik Hikki tərəfindən yüksək qiymətləndirilib. Onun fikrincə loqonun hazırlanması oyunların təbliğatı baxımından vacib addım sayılmalıdır: "Avropa tarixində ilk dəfə özünün qitə üzrə multi-idman tədbirini keçirəcək. Əksər avropalı atletlər üçün bu tədbir ölkələrini təmsil etmək imkanı qazandıracaq. Loqonun təqdimatı yarışın yüksək səviyyədə keçirilməsi istiqamətində atılan vacib addımdır. Bakının bu oyunları layiqli şəkildə keçirəcəyinə əminəm."
Qeyd edək ki, 2015-ci ildə Bakıda keçiriləcək birinci Avropa Oyunlarında 49 Olimpiya ölkəsindən 5400-dən çox atletin 18 idman növü üzrə yarışmasına şahid olacağıq.
Azərbaycanın tanınmış idmançıları loqo haqda müsbət fikirdədirlər. 2004-cü ildə Afinada keçirilən Olimpiya Oyunlarında Azərbaycana qızıl medal qazandıran yunan-Roma güləşçisi Fərid Mansurov fikrini belə izah etdi: "Bakı-2015" atletlər üçün karyera müəyyənləşdirən imkanlar və məqamlarla, azarkeşlər üçün yüksək səviyyəli idman tədbirləri ilə yadda qalacaq, gənclər üçün ilham qaynağı olacaq. Bu loqonun daşınması Avropa idmanının gələcəyini formalaşdırmağın tərkib hissəsi olmalıdır. Loqo bütün dünyaya ölkəmiz haqda məlumat verəcək."
Atıcılıq üzrə 2000-ci ildə Sidneydə olimpiya çempionu olan Zemfira Meftahəddinova turnir yaxınlaşdıqca həyəcanın artdığını söylədi. Avropa Oyunlarının təkcə ölkəmizin deyil, həmçinin idmançıların da həyatında mühüm hadisə olacağını düşünən xanım idmançımız loqonu bəyəndiyini gizlətmədi.
Avroolimpiadanın loqosu İspaniya çempionatında Vicente Calderon Stadionunda "Hetafe" klubuna qarşı oynayan "Atletiko" Madrid futbol klubunun oyunçularının köynəklərində də əksini tapdı. Azərbaycanla strateji müttəfiqliyinin tərkib hissəsi kimi ispan futbol klubu loqonu stadionun ekranında nümayiş etdirməklə birinci Avropa Oyunlarına dəstək oldu. Həmin matçda David Vilya, Dieqo Kosta və Arda Turan kimi dünyada tanınan futbolçular Vicente Calderon Stadionunda "Hetafe" klubu üzərində 7:0 hesablı qələbə qazandı.
"Atletiko"nun ulduz hücumçusu Dieqo Kosta bildirib: "Biz “Atletiko” Madrid olaraq 2015-ci ildə Bakıda keçiriləcək Avropa Oyunlarını dəstəkləyirik. Həm "Atletiko", həm "Bakı" bu işdə birgədirlər!"
Dieqonun komanda yoldaşı Arda Turan da mötəbər yarışla bağlı fikrini açıqlayıb: "İdmanla insanları və ölkələri birləşdirəcək birinci Avropa Oyunlarının Bakıda keçirilməsinə çox şadam. Bu oyunların gənclərdə idmana maraq oyadacağına və bütün Avropada Olimpiya atmosferi yaradacağına inanırıq. Biz də sizinlə oynayacağıq!"
Beləliklə, Avropa Oyunlarının loqosu artıq bütün idman aləminə təqdim olunub. Bu emblem dünyanın aparıcı televiziya kanalları, qəzet və saytlarında nümayiş olunur. Ölkəmizin qədim və müasir mədəniyyətini özündə əks etdirən loqo hər bir azərbaycanlının qürur mənbəyidir. Getdikcə həyəcan artır və Avropa Oyunlarının başlamasına az vaxt qalır.
"BAKI - 2015" LOQOSUNUN SİMVOLLARI
"Bakı - 2015" loqosu ölkəmizin qədim və müasir mədəniyyətinin beş başlıca elementini özündə cəmləşdirib:
Xalı: UNESCO-nun 2010-cu il Bəşəriyyətin Qeyri-Maddi Mənəvi İrsinin Nümunələrinin Siyahısına daxil edilmiş Azərbaycan xalçaçılıq sənəti ölkənin əksər xalçaçılıq bölgələrində şifahi və əməli şəkildə nəsildən-nəslə ötürülən ailə ənənəsidir. Loqonun bu elementi "Bakı- 2015" planlarına xas olan mədəni irsin, müxtəlifliyin və yaradıcı ifadənin vacibliyi kimi prinsipləri əks etdirir.
Alov: Azərbaycan "Odlar yurdu" kimi tanınır. Bakının hər yerindən görünən və alov dillərinin hərəkətini əks etdirən LED ilə örtülən "Alov qüllələri" və dan yeri ağaranda yerin təkindən çıxan təbii qazla alovlanan "Yanardağ" dünyanın hər yerindən turistləri cəlb edir. Bu element Bakının Avropanın ilk Avropa Oyunlarına ev sahibliyi etmək üçün alışıb-yanan ambisiyasını əks etdirir.
lDalğa: Dəniz səviyyəsindən 28 metr aşağıda yerləşən Bakı dünyanın ən alçaq nöqtəsində yerləşən paytaxt şəhəridir. Bu şəhər, həmçinin dünyanın ən böyük gölü kimi tanınan Xəzər dənizinin yaxınlığındakı Abşeron yarımadasının cənub sahilində yerləşir. Bakı limanı dünyanın ən böyük dəniz limanı olub, tarixi 1902-ci ildən başlayır. Hal-hazırda Azərbaycan paytaxtının unikal coğrafi mövqeyi onun iqtisadi, sosial və mədəni inkişafına təkan verir. Bu element şəhərin Xəzər dənizinin sahili boyu şərq-qərb oxu üzrə dinamik inkişafının və qitədə idmanın gələcəyini formalaşdıracaq Avropa Oyunları üçün yeni dalğa konsepsiyasının rəmzidir.
Simurq quşu: Xoşməramlı əfsanəvi Simurq quşu Yerlə Göy arasında vəhdətin rəmzi hesab edilib, hər ikisi arasında vasitəçi və müjdəçi rolunu oynayır. Bu element Azərbaycan xalqının təbiətlə bağlılığının, onların 2015-ci ildə atlet, azarkeş və rəsmiləri qarşılayarkən göstərəcəkləri mehribanlıq və qonaqpərvərli- yin rəmzidir.
Nar: Azərbaycanda məşhur olan meyvə və irs kimi, nar əzəldən bərəkət və bolluğun rəmzi olmuşdur. Loqonun bu beşinci elementi "Bakı - 2015"in avropalıları idman sahəsində bir araya gətirmək və gələcək nəsillər üçün miras qoymaq ambisiyasını təmsil edir.
MƏSLƏHƏT GÖR: