
"BU, ÇOX TƏHLÜKƏLİDİR"
Eks-konqresmen Maykl Makmahon: "Bizim Cənubi Qafqazdakı nüfuzumuz azalır"
Müəllif: Fuad HÜSEYNZADƏ Bakı
Bu günlərdə Amerika Konqresinin "TheHill" nəşrində Nyu-York ştatından sabiq konqresmen, demokrat Maykl Makmahonun məqaləsi dərc olunub. O, oktyabrın 9-da Azərbaycanda keçirilmiş prezident seçkisini müşahidə etmiş şəxslərdəndir. Eks-konqresmen məqaləsində ATƏT DTİHB və ABŞ Dövlət Departamentini tənqid edir, Azərbaycanda prezident seçkisinin yaxşı təşkil olunduğunu, ədalətli və şəffaf keçdiyini bildirir.
Maykl Makmahon "R+" jurnalının suallarını cavablandırıb.
- Siz Azərbaycanda oktyabrın 9-da keçirilmiş Prezident seçkisini müşahidə etmisiniz. ABŞ Dövlət Departamenti və ATƏT DTİHB tərəfindən seçki prosesi ilə bağlı səsləndirilən tənqidlər haqda nə deyə bilərsiniz?
- Mənim müşahidələrim onların dediklərindən xeyli fərqlənir. Amma qrupumuzdan olan digər müşahidəçilər və Avropa Parlamentinin müşahidəçilərinin rəyləri mənim fikirlərimlə üst-üstə düşür. Siyasətçi olaraq, diqqətin nələrə cəlb edilməli olduğunu bilirəm. Hesab edirəm ki, səslərin hesablanması seçkinin nəticəsini tam əks etdirir.
- Azərbaycan-Amerika münasibətlərinin gələcəyini necə görürsünüz?
- Qəti şəkildə əminəm ki, Azərbaycan Birləşmiş Ştatların vacib müttəfiqidir və bizim əlaqələrimizin möhkəmlənməsi Amerikanın təhlükəsizliyi, milli maraqları baxımından həlledici əhəmiyyətə malikdir. Vaşinqton üçün terrorçuluqdan başqa iki böyük problem var: İran və Rusiya. Azərbaycan məhz bu iki dövlətin arasında yerləşir və onların hər ikisi ilə həmsərhəddir. Bundan başqa, Azərbaycan bizim yaxşı müttəfiqimiz olmağa çalışır. Biz bu vacib faktı etiraf etməli və dostluğumuzu möhkəmləndirməliyik.
- Amma məlum 907-ci düzəliş ölkələrimiz arasında ikitərəfli münasibətləri ciddi şəkildə məhdudlaşdırır. Yaxın zamanlarda onun tamamilə aradan qaldırılacağına ümid etmək olarmı? Bu, hansı halda mümkündür?
- Mən uzun müddət 907-ci düzəlişə qarşı mübarizə aparmışam. Onu Amerikanın xarici siyasətində qüsur hesab edirəm. Demokratlar Partiyasından olan Konqres üzvləri Obama administrasiyasını bu düzəlişin tam aradan qaldırılmasının vacibliyinə inandırmalıdırlar.
- Təəssüf ki, ABŞ Qarabağ münaqişəsinin həllində də son dərəcə passivdir. Həm regionun, həm də bütövlükdə avro-Atlantik məkanın təhlükəsizliyi üçün problem olan bu münaqişə ilə bağlı ABŞ-ın hazırk? mövqeyini necə qiymətləndirirsiniz?
- Fikrimcə, Birləşmiş Ştatların xarici siyasətində Dağlıq Qarabağdakı vəziyyətə etinasızlıq hökm sürür. Bu, ciddi risk yaradır. Biz regionda sabitliyə çalışmalıyıq. Gürcüstanda bu yaxınlarda keçirilmiş seçkilərin nəticəsi göstərdi ki, bizim Cənubi Qafqazdakı nüfuzumuz azalır. Bu, çox təhlükəlidir. Biz bu münaqişəyə prezident Klintonun Balkanlardakı böhrana göstərdiyi diqqəti göstərməliyik.
- İlin sonunda Azərbaycan BMT Təhlükəsizlik Şurasının qeyri-daimi üzvü kimi, yerini Litvaya verəcək. Respublikamızın bu nüfuzlu strukturda ikiillik fəaliyyətinin nəticələrini necə qiymətləndirirsiniz?
- Azərbaycan çox yaxşı işlədi, amma layiq olduğu qiyməti almadı.
MƏSLƏHƏT GÖR: