PORTUNUN SİRLƏRİ

Portuqaliyanın ikinci ən böyük şəhəri olan Portu turistləri özünəməxsus ab-havası, tarixi, heyrətamiz mənzərələri və dadlı mətbəxi ilə cəlb edir. Bu şəhər qədim zamanlardan mühüm ticarət və mədəniyyət mərkəzi olub, hələ də qədim ənənələri müasir tendensiyalarla birləşdirərək öz cazibədarlığını qoruyub saxlayır. Əgər rahatlıq, müasirlik və qastronomik zövq elementləri ilə köhnə Avropa atmosferinə qərq olmaq istəyirsinizsə, Portu ən yaxşı variantlardan biridir.

Körpü vizit kartı kimi

“Körpülər şəhəri” kimi tanınan Portu Portuqaliyanın şimal-qərbində, Atlantik okeanı sahilində yerləşir. Bir qədər İstanbula bənzəyən şəhərin tam ortasından Doru çayı axır və onun sahillərini hər biri öz tarixinə malik altı körpü birləşdirir. Lakin Portunun ən maraqlı görməli yerlərindən biri, necə deyərlər, onun “vizit kartı” Kral I Luiş körpüsüdür (Ponte Dom Luís I). Bu birləşdirilmiş metal tağlı körpü Doru çayı üzərindən keçərək Portu şəhərini və ölkənin portveyn şərab növünün istehsalının mərkəzi olan Vila-Nova-di-Qaya şəhərini birləşdirir. 500 metrdən çox uzunluğa malik olan körpü 1886-cı ildə məşhur Qustav Eyfelin tələbəsi və tərəfdaşı olan Teofil Seyriqin layihəsi əsasında inşa edilib. Körpü boyunca piyada gəzintisi zamanı çay və onun sahillərində yerləşən rəngarəng evlərə heyrətamiz mənzərə açılır. Bura Portunun simvoluna, o cümlədən fotoqraflar və çoxsaylı turistlər üçün sevimli məkana çevrilib.

Ümumiyyətlə, Portunun tarixi Roma dövrünə qədər uzanır və bu gün şəhərin memarlıq irsi əsl xəzinədir. Portu boyunca gəzərkən, Roma dövrünün xarabalıqlarından tutmuş barokko üslubunda olan qəsr və kilsələrə qədər, bir çox binanın keçmişin izlərinin qorunduğunu görəcəksiniz. Doru çayının sahilində, şəhərin simvolu olan əsas körpünün altında yerləşən Portunun tarixi rayonu olan Ribeyranı mütləq gəzin. Onun dar küçələri, plitələrlə bəzədilmiş qədim binaları, çaya və şəhərə mənzərənin açıldığı rahat kafe və restoranları ənənələrin ruhu ilə dolu olan qədim dünyaya dair inanılmaz atmosfer yaradır.

Ribeyra şəhərin tarixi mərkəzinin bir hissəsidir. Onun rəngarəng memarlığı UNESCO-nun Dünya İrsi Siyahısına daxil edilib. Bir çox binalar parlaq, pastel rənglərlə boyanıb və bu da sanki rayonu canlandıran rəngarəng divarlar effekti yaradır. Məhz buna görə deyirlər ki, bu küçələrdə gəzmək şəhərin tarixi və mədəni qatlarını sizə açan zaman səyahətini xatırladır.

Siz, həmçinin çayın o biri sahilində yerləşən bir neçə mənzərəli şərab zirzəmisini görə bilərsiniz. Bunlar məşhur portveyn şərab növünün istehsal edildiyi tanınmış şərab zavodlarıdır və onların bir çoxu dequstasiya ilə ekskursiyalar təklif edir. Üstəlik, bu keyfiyyətli içkinin qiyməti çox ucuzdur - yerli kafedə bir şüşə üçün 8 avrodan başlayır. Supermarketlərdə isə onu daha ucuz - 5-6 avroya almaq mümkündür.

Top-10 məkan

Portuda olarkən, mütləq görməli olduğunuz görməli yerləri unutmayın. Onların arasında Müqəddəs Fransisk kilsəsi (San-Fransişku) əlamətdar yer tutur. XIII əsrdə qotik üslubda tikilmiş bu möhtəşəm tikili öz unikal daxili dizaynı ilə diqqəti cəlb edir. Qızılı rəngdə naxışlar və ağac oymaları zənginliyi və zərifliyi ilə heyrətləndirir. Altar və “İessey ağacı” ikonoqrafik kompozisiyasına diqqət yetirin, burada İsa Məsihin şəcərəsi təsvir olunub. Ümumilikdə, bu kilsənin zəngin bəzəyinin yaradılmasına təxminən 200 kq qızıl tozu sərf olunub.

Lakin şəhərdə əsas dini tikili Portu Kafedral Kilsəsi hesab olunur. Baxmayaraq ki, o, xarici görünüşünə görə məbəddən daha çox qalaya bənzəyir. Bunun səbəblərindən biri onun roman üslubunda inşa edilməsidir. Məbədin zalları bəzəyinin sadəliyi və orta əsrlər dövrünə tamamilə uyğun olan bir qədər tutqun atmosferi ilə fərqlənir. Əgər Portuya iyunun 12-13-də gəlsəniz, yerli əhali ilə birlikdə mahnılar, rəqslər, müxtəlif tamaşalar və ümumi şənliklərlə müşayiət olunan gözəl kütləvi bayramda iştirak edə bilərsiniz.

Qədim memarlıq həvəskarları şəhərin keçmiş fond birjası olan Palasio da Bolsanı mütləq ziyarət etməlidirlər. Bu bina neoklassisizm üslubunda inşa edilib və şəhərdəki ən gözəl binalardan biridir. Onun əzəmətli sütunları və qızıl detallarla bəzədilmiş heyrətamiz tavanı olan əsas zalı, Millətlər Zalı, dərin təəssürat yaradacaq. Sarayın incisi Ərəb zalı hesab olunur. Burada  “Allah, Kraliça II Merini qorusun” və “Allah təkdir və Allahdan başqa ilah yoxdur” yazıları var.

Serralveş Müasir İncəsənət Muzeyi - şəhərin ən məşhur mədəni obyektlərindən biridir. O, gözəl parkda yerləşir, rəssamlıq bağları ilə əhatə olunub və təkcə XX və XXI əsrlərin incəsənət kolleksiyaları ilə deyil, həm də minimalist üslubda layihələndirilmiş binanın unikal memarlığı ilə diqqəti cəlb edir. Əgər siz daha ənənəvi incəsənət əsərlərini sevirsinizsə, məşhur memarın işlərinin, həmçinin katalon modernizminin digər abidələrinin təqdim olunduğu Qaudi Muzeyini qaçırmayın. Mühüm görməli yerlər arasında barokko üslubunda tikilmiş və Portuqaliyanın ən hündür kilsəsi kimi tanınan Kleriquş kilsəsi və zəng qülləsi var. Bir neçə əsr ərzində o, Portu limanına gedən gəmilər üçün mayak kimi xidmət edib, indi isə şəhər sakinləri və turistlər onunla istiqamətlənirlər - zəng qülləsi şəhərin, demək olar ki, hər nöqtəsindən görünür.

UNESCO tərəfindən Dünya İrsi Siyahısına daxil edilmiş qədim qalanın təsirli divarları artıq Qimaraynşə səfər etmək üçün bir səbəbdir. Onun Portuqaliyanın ən yaxşı qalaları sırasına daxil edilməsi, həmçinin zəngin tarixi və divarlarından açılan heyrətamiz mənzərələr bu görməli yeri turistlər üçün mütləq ziyarət edilməli edir.

Portudakı San-Bentu vağzalı divarlarını bəzəyən heyrətamiz plitələr sayəsində şəhərin ən populyar yerlərindən birinə çevrilib. Bu məşhur mavi və ağ plitələrdə Portuqaliyanın tarixindən səhnələr təsvir olunub. 1916-cı ildə açılmış vağzal təkcə mühüm nəqliyyat qovşağı deyil, həm də dünyanın hər yerindən turistləri cəlb edən əsl incəsənət əsəridir.

Portunu ziyarət edənlərə bələdçilər şərab zirzəmilərinə ekskursiyalar etməyi və portveyn dadmağı, Doru çayı boyunca kruizə çıxmağı, “Bom Sucesso” bazarında nahar etməyi, axşamı Ribeyrada keçirməyi, sonra isə Galeria-de-Pari küçəsində “avtoparti” keçirməyi məsləhət görürlər. Bundan əlavə, Foş rayonunda tramvaya minməyi, Bolyan bazarında alış-veriş etməyi, yaxınlıqdakı Matuzinyuş çimərliyində dincəlməyi və Portuqaliyanın ən uğurlu futbol klublarından biri olan “Portu”nun “Draqan” stadionunu gəzməyi tövsiyə edirlər.

Şəhəri gəzərkən özünüzə qulluq etməyi unutmayın. Bunun üçün buranın ən məşhur kafesinə - “Majestic”ə getmək kifayətdir. Bu, təkcə dadlı qəhvə içmək və şirniyyat dadmaq üçün populyar yer deyil, həm də şəhərin tarixi simvoludur. Kafe 1921-ci ildə açılıb və o vaxtdan bəri öz populyarlığını qoruyub saxlayır. O, ar-nuvo üslubunda hazırlanıb. İnteryer vitrajlar, oyma taxta panellər və güzgülərlə bəzədilib ki, bu da zənginlik atmosferi yaradır. Bura yazıçıların, rəssamların və turistlərin sevimli görüş yeridir.

Harri Potter harada doğulub, yaxud reklamın sehri

Livraria Lello ("Lello") - dünyanın ən qeyri-adi və gözəl kitab mağazalarından biridir. Bu, sadəcə kitab almaq üçün ticarət nöqtəsi deyil, həm də dünyanın hər yerindən minlərlə turisti və ədəbiyyat həvəskarını cəlb edən əsl turizm istiqamətidir.

“Lello” Portuqaliyanın ən qədim kitab mağazalarından biri hesab olunur, memarlığı və tarixi onu həqiqətən unikal bir yer edir. O, 1906-cı ildə iki qardaş - Joze və Antoniu Lello tərəfindən açılıb. Açıldığı gündən mağaza qeyri-adi memarlığı və XIX əsrin sonu - XX əsrin əvvəllərinin ən yaxşı ənənələrini əks etdirən atmosferi ilə diqqəti cəlb edir. Bələdçilərin söylədiyinə görə, bura sadəcə kitab mağazası deyil, həm də incəsənət, mədəniyyət və ədəbiyyatın görüşdüyü və hər küncünün tarixlə nəfəs aldığı bir yerdir.

Kitab mağazasının özü neoqotik üslubda, modern və ar-deko elementləri ilə tərtib edilib. Bina oyma taxta detallar, vitrajlarla bəzədilib, divarlar və tavanlar zərif naxışlarla örtülüb. Zərif qırmızı məhəccərli pilləkənə xüsusi diqqət yetirmək lazımdır. “Lello” təkcə memarlığı ilə deyil, həm də zəngin kitab seçimi ilə məşhurdur. Burada həm portuqaliyalı müəlliflər, həm də dünya bestsellerləri, özü də bir neçə dildə təqdim olunub.

Əslində, “Lello”un reklamını internetdə yayılmış tarixi hadisə edir. Belə ki, kitab mağazasını məşhur britaniyalı yazıçı, “Harri Potter” haqqında silsilə kitabların müəllifi Coan Roulinq dəfələrlə ziyarət edib. Və hesab olunur ki, məhz burada o, sehrli dünya yaratmaq üçün ilham alıb. Mağazanın interyer elementlərindən bəziləri, məsələn, möhtəşəm pilləkən və vitrajlar, guya Harri Potter haqqında kitablardakı bəzi səhnələr üçün prototip olub. Buna görə də bu yer Potter dünyasının pərəstişkarları üçün əsl ziyarətgaha çevrilib.

Belə bir tarixlə yayılmış reklam sayəsində mağaza turistlərin böyük marağına səbəb olur və artıq 10 ildir ki, “Lello”ya giriş üçün pul ödəmək lazımdır. Hazırda onlayn bilet alışı 8 avroya başa gəlir, üstəlik növbədə dayanmaq lazım gələcək. Lakin hər hansı bir kitab alsanız, biletin qiyməti alış məbləğindən çıxılacaq. Əgər turist kütlələri olmadan "Lello" kitab dünyasının atmosferini hiss etmək istəyirsinizsə, onu həftə içi günlərdə ziyarət etmək daha yaxşıdır.

Ucuz Portuda

Bəli, Portudakı qiymətlər çoxlarını, yaxşı mənada, təəccübləndirə bilər. Birincisi, Portuqaliyada olarkən, bir çox şəhərlərdən buraya avtobus və ya qatarla cəmi 8-20 avroya çatmaq olar.

Portuda ictimai nəqliyyat üçün kifayət qədər mürəkkəb diferensial tarif sistemi olduğunu nəzərə alaraq, dərhal 7,5 avroya (ən sadə və ucuz olanı ümumiyyətlə 4,2 avrodur) 24 saatlıq Andante səyahət kartı almaq daha yaxşıdır. Bu kart, səyahət məsafəsinə görə tariflər fərqli olsa da, bütün ictimai nəqliyyat növlərindən istifadəyə imkan verir.

Portuda hər zövqə və büdcəyə uyğun yaşayış variantları tapmaq asandır. Şəhərin hotelləri müxtəlifdir - lüks hotellərdən tutmuş rahat butik-hotellərə və gənc səyahətçilər üçün hostellərə qədər. Və Avropa üçün qiymətlər kifayət qədər cəlbedicidir. Beşulduzlu hotellərdə qalmağın gecəsi 110-210 avro arasındadır. Burada lüks otaqlar və SPA prosedurları və qapalı hovuzlar kimi əlavə xidmətlər təklif olunur. Keyfiyyətli 4 ulduzlu hotellərdə 70-110 avroya, 3 ulduzlu hotellərdə isə 50-80 avroya qalmaq mümkündür. Eyni zamanda şəhərdə iki nəfər üçün 35-55 avroya çoxlu hotellər və ya büdcəli mənzillər var.

Mətbəxə gəlincə, o, dəniz məhsulları, ət və pendirlərin mühüm yer tutduğu bölgənin mədəni irsini əks etdirir. Qastronomiya ləzzətləri arasında “francesinha” - ət, kolbasa, pendir və sousla hazırlanmış, sobada bişirilmiş sendviç (ortalama 8-10 avro) xüsusilə qeyd edilməlidir. Bu yemək yerli sakinlər arasında populyardır və şəhərin əsl kulinariya simvoludur. Həmçinin tərəvəz və ədviyyatlarla bişirilmiş yerli duzlu treska “bacalhau”nu (12-15 avro) da dadmağa dəyər. Portu həm də qədim reseptlərlə hazırlanmış digər dəniz məhsulları ilə məşhurdur. Yerli balıq şorbalarını (5-6 avro) dadmağı unutmayın. Bu arada, dəmiryol vağzalının yaxınlığında çoxlu dönər kafeləri (6-10 avro) var, lakin onlarda əsasən banqladeşlilər və ya nepallılar işləyirlər. Şirniyyat həvəskarları karamelli badam pirojnalarını (5-6 avro) dadmalıdırlar. Ribeyra sahili boyunca gəzərkən, qızardılmış şabalıd (12 ədədi 3-6 avro) alın.

Bir sözlə, Portu hər səhər yeni təəssüratlar gətirən bir şəhərdir. Qədim tarixin, parlaq mədəniyyətin, nəfis mətbəxin və təkrarolunmaz atmosferin unikal birləşməsi onu kəşflərlə dolu səyahət axtaranlar üçün ideal məkan edir. İstər qədim küçələrdə gəzmək, istər şərab dequstasiyası, istərsə də incəsənətlə tanışlıq olsun - Portu hər səyahətçiyə xüsusi bir şey təklif edir.