MADRİDDƏ 48 SAAT

İspaniyanın paytaxtı təzadlar şəhəridir. Burada qədim meydanlar müasir rayonlarla yan-yana yerləşir və səs-küylü küçələr sakit parklar və bağlarla əvəz olunur. Madriddə o qədər görməli yerlər var ki, hətta onların yarısını ətraflı nəzərdən keçirmək üçün bir həftə də kifayət etməz. Lakin əgər marşrutu əvvəlcədən planlaşdırsanız, paytaxtın ritmini hiss etməyə, əsas mədəni obyektləri görməyə, milli yeməkləri dadmağa və şəhərin ab-havasını duymağa iki-üç gün belə kifayət edir. Bu bələdçi Madridlə praktik tanışlıq üçün nəzərdə tutulub. Bu zaman hər addım elə düşünülüb ki, 48 saata sığışsın və gəzintilərdən zövq ala biləsiniz.

Paytaxtın dörd əhvali-ruhiyyəsi

Cənub iqlimi sayəsində İspaniyanın əsas şəhəri qonaqları, demək olar ki, il boyu qəbul edir. Təbii ki, hər fəslin öz müsbət və mənfi cəhətləri var. Məsələn, Madriddə qış Şimali Avropa şəhərləri ilə müqayisədə mülayimdir: gündüz temperatur adətən 5-12 dərəcə isti olur, lakin gecələr sərin keçir. Şəhər Milad işıqları və yarmarkalarla bəzədilir: xüsusilə də Plaza Mayor və Puerta del Sol kimi mərkəzi meydanlarda. Bu vaxt muzeyləri, teatrları və flamenko şoularını ziyarət etmək, həmçinin park və küçələrdə qış gəzintiləri üçün idealdır. Yanvarda endirimli satışlar olur ki, bu da şəhər gəzintisini alış-verişlə birləşdirmək istəyən turistləri cəlb edir.

Yaz fəsli Madridi ziyarət etmək üçün ən yaxşı vaxtdır. Temperatur 12-22 dərəcə arasında dəyişir, şəhərin özü isə qış sakitliyindən sonra canlanır. Küçələr çiçəklənən ağaclarla dolur, xüsusilə Retiro parkında alma ağacları və maqnoliyalar nağılvari mənzərə yaradır. Bu, tarixi mərkəz boyunca piyada gəzintiləri və açıq kafe terraslarına baş çəkmək üçün mükəmməl vaxtdır. Mart və apreldə mədəni tədbirlər, muzeylərdə sərgilər keçirilir. Aprel ayının sonunda isə “Çiçək və musiqi” festivalı başlayır və bu zaman küçə konsertlərini, ustad dərsləri keçirilən yarmarkaları görmək mümkündür. Baharda yaydan fərqli olaraq turistlər daha az olur və təbii ki, muzey və saraylara gedən növbələr də qısadır.

Madriddə yay adətən isti keçir - temperatur 30-35 dərəcəyə çatır və hətta bundan da yuxarı olur. Gündüz muzeylərin, sarayların və digər qapalı obyektlərin ziyarət edilməsini planlaşdırmaq, gəzintiləri isə temperaturun aşağı düşdüyü səhər və ya axşam vaxtlarına saxlamaq daha yaxşıdır. Yay axşamları açıq terraslarda tapas-barlar, o cümlədən Çueka və Malasana kimi məşhur rayonlarda gəzinti üçün idealdır. İyul və avqust aylarında açıq havada musiqi festivalları, açıq havada kino nümayişləri və parklarda konsertlər keçirilir. Yay mövsümünün üstünlüyü - uzun işıqlı axşamlardır ki, bu da gec saatlara qədər gəzintilərdən həzz almağa imkan verir. Mənfi cəhəti isə turistlərin daha çox olmasıdır. Buna görə də məşhur muzeylərə və digər bənzər yerlərə biletləri əvvəlcədən sifariş etmək lazımdır.

Payız - Madridi ziyarət etmək üçün daha bir gözəl mövsümdür. Temperatur 15-22 dərəcə arasında qalır, hava təmizdir və şəhər qızılı tonlarda boyanır. Bu vaxt parklarda gəzmək, bazarları və kafeləri ziyarət etmək, həmçinin mədəni tədbirlər üçün idealdır: payızda teatr festivalları, musiqi həftələri və mövsümi xörəklərlə qastronomik yarmarkaları keçirilir. Bu vaxt turistlər yaya nisbətən daha az olur, lakin ab-hava hələ də canlı qalır. Xüsusilə də isti yaydan sonra mülayim iqlim və şəhərin ləng ritmi ilə həzz alaraq tarixi mərkəzdə gəzmək xoşdur.

Turist necə rahat hərəkət edə bilər?

Optimal hərəkət üsulu turistin vaxtından, büdcəsindən və maraqlarından asılıdır. Madrid-Barajas hava limanından şəhər mərkəzinə ən asan yol metro, qatar və ya taksidir. Metro hava limanının bütün terminallarını şəhərin mərkəzi rayonları ilə 30-40 dəqiqəyə birləşdirir. Hava limanından metro biletinin qiyməti təxminən 7,3 avrodur. “Cercanías” qatarı hava limanından şəhərin əsas dəmiryol stansiyalarına 2,5-3 avroya çatmağa imkan verir və səfərin müddəti 25 dəqiqə çəkir. Taksi şəhər mərkəzinə 30-35 avroya çatdıracaq ki, bu da çoxlu baqajı olan turistlər və ya qrup halında səfər edənlər üçün rahat və sərfəlidir.

Madrid üzrə hərəkət üçün ən yaxşı üsul metro, avtobus və tramvay xətləridir. Metro səhər 6:00-dan gecə 1:30-a qədər işləyir, bir səfər üçün bilet zonadan asılı olaraq 1,70-2 avro təşkil edir. Avtobuslar metronun getmədiyi rayonları əhatə edir və şəhərdə rahat hərəkət etməyə imkan verir. Turistlər üçün 1-7 günlük nəqliyyat kartları rahatdır, bunun sayəsində istənilən qədər metro, avtobus və elektrik qatarlardan istifadə etmək olar. Günlük kartın qiyməti 9, üçgünlük kartın qiyməti isə 18-20 avrodur. Lakin ən əlverişli variant 7,30 avroya on səyahət üçün “Suma10” kartıdır.

Əgər turistin vaxtı azdırsa və maksimum dərəcədə çox yerləri görmək istəyirsə, rahat variant “Madrid city tour” adlı 2 mərtəbəli ekskursiya qırmızı avtobuslarıdır. Təəssüf ki, Madriddə dayanacaq problemi səbəbindən bu avtobuslar artıq hər bir görməli yerdə dayanmır, sadəcə şəhərdə audio-bələdçinin müşayiəti ilə 2 saatlıq dairə edir. 24 saatlıq bilet - 25, 48 saatlıq bilet isə 40-45 avrodur.

Qənaət və rahatlıq üçün turistlər “Madrid Card” və ya “Art Walk Pass” kartından istifadə edə bilərlər. Bu kartlar etibarlılıq müddəti ərzində ictimai nəqliyyatdan məhdudiyyətsiz istifadə etməyə, Prado, Reyna Sofiya və Tissena-Bornemis kimi əsas muzeylərdə endirimlər və ya pulsuz giriş əldə etməyə, ekskursiyalarda iştirak etməyə və bəzi restoran və mağazalarda bonuslar almağa imkan verir. Kartların qiyməti etibarlılıq müddətindən asılıdır: 1 gün üçün təxminən 50, 2 gün üçün 65-70, 3 gün üçün 80-85 avro.

Birinci gün. Şəhərin qəlbi ilə tanışlıq

İlk səhəri əsas küçələrin birləşdiyi Madridin tarixi mərkəzi olan Puerta del Sol meydanından başlamaq daha yaxşıdır. Bura hər zaman izdihamlı olur, lakin erkən səhər atmosferi abidələrin, küçə musiqiçilərinin və işə tələsən ilk piyadaların mənzərəsindən həzz almağa imkan verir. Buradan arkadaları olan möhtəşəm Plaza Mayor meydanına rahat çıxmaq olar, burada isə kafelər və şirniyyat dükanları yerləşir. Burada ənənəvi ispan səhər yeməyini – “churros con chocolate” (qatı isti şokoladla qızardılmış xəmir) sınaqdan keçirmək daha yaxşıdır. Onun bir porsiyasının qiyməti 5-8 avrodur, zövq və yerli mədəniyyət hissi isə heyrətamizdir.

Səhər yeməyindən sonra Kral Sarayına üz tutmaq lazımdır. Onun hətta sürətli nəzərdən keçirilməsi (bilet alarkən növbədən əlavə) təxminən iki saat çəkəcək. Böyüklər üçün biletlər təxminən 18-23 avro, tələbələr və yaşlılar üçün 50 faizə qədər endirimlər var. Yaxınlıqda Almudena Kafedralı yerləşir və şəhərin panoramik mənzərəsini seyr etmək üçün günbəzə 7 avroya qalxmaq olar. Bundan sonra saray və bağlara gözəl mənzərələrin açıldığı Sabatini parkında gəzmək olar.

Nahar etməyi La-Latina bölgəsində planlaşdırmaq daha yaxşıdır. Burada çoxsaylı tapas-barları cəmləşib: bir ədədin qiyməti 1,5-2,5 avrodur. Xamon, tortilla, paella və təzə dəniz məhsullarını dadmaq tövsiyə olunur. Nahardan sonra köhnə Madridin dar küçələrində gəzmək və küçə artistləri ilə kiçik meydanların gözəlliyini kəşf etmək olar.

Günortadan sonra isə La-Latina məhəlləsində gəzmək, Templo de Debod müşahidə meydançasına baş çəkmək və oradan günbatımının gözəlliyini seyr etmək olar. Axşam isə gecə həyatının olduğu Malasana və ya Çueka rayonlarına getmək daha yaxşıdır. Burada yerli şərabları (bir qədəh üçün 4-7 avro) dadmaq, canlı musiqi dinləmək və ya sadəcə rəngarəng küçələrdə gəzmək olar.

İkinci gün. Şəhərin incəsənəti, parkları və ləzzətləri

İkinci günün səhərini muzeylərlə başlayın. Prado - proqramın əsas bəndlərindən biridir. Bu, Velaskes və Qoyadan tutmuş El Qreko və Rembrandta qədər Avropa rəssamlığının şah əsərlərinin toplandığı rəssamlıq muzeyidir. Pradonun 8 mindən çox rəsm əsəri və 20 min kvadratmetr sərgi zalları olan Avropanın ən böyük muzeylərindən biri olduğunu nəzərə alaraq, yalnız əsas rəsm əsərlərinə baxmaq 3-4 saat çəkir. Biletlər təxminən 15 avroya başa gəlir, tələbələr və pensiyaçılar üçün 50 faiz endirim mövcuddur, lakin son iki iş saatında gəlsəniz (18:00-20:00), muzeyə pulsuz daxil ola bilərsiniz. Müasir incəsənət həvəskarları üçün alternativ var: yaxınlıqda yerləşən, Pikassonun “Qernika” əsərinin olduğu Reina Sofia Muzeyi. Biletin qiyməti 12 avrodur.

Muzeyləri ziyarət etdikdən sonra göllər, heykəllər və gözəl xiyabanları olan, Madridin rəsm kimi yaşıl guşəsində - Retiro parkında gəzin. Burada 8-10 avroya qayıq kirayəyə götürmək, kristal pavilyonu (hazırda bərpa işləri gedir) ziyarət etmək və şəhərin səs-küyündən dincəlmək olar. Küçə musiqiçiləri və rəssamları şəhəri daxildən hiss etməyə imkan verən aura yaradırlar.

Nahar üçün ən yaxşı seçim yerli bazarlardan birinə (məsələn, “San Miguel”) getməkdir. Burada ənənəvi yeməklər, dəniz məhsulları və təzə tapaslar təqdim edilir. Seçiminizdən asılı olaraq, burada nahar 15-20 avroya başa gələ bilər. Burada sizə müxtəlif qəlyanaltılar, zeytun, pendirlər və yerli şərablar təklif edəcəklər.

Nahardan sonra vaxtınızı alış-veriş və şəhərin əsas küçələrində gəzintiyə həsr edin. Qran Viada həm beynəlxalq brendlər, həm də yerli mağazalar yerləşir. Elit alış-veriş həvəskarları isə məşhur dizaynerlərin butikləri olan Salamanka rayonunu ziyarət edə bilərlər. Bu küçələrdə gəzinti sizə alış-verişi turistik marşrutlarda görməyəcəyiniz memarlıq və şəhər detallarını araşdırmaqla birləşdirməyə imkan verir.

İkinci günün axşamı flamenko şousuna gedin, burada sizi İspaniyanın enerjisinə qərq edən temperamentli rəqslər, valehedici gitara musiqisi və emosional mahnılar gözləyir. Tədbir üçün biletlər məkanın səviyyəsindən asılı olaraq 20-40 avroya başa gəlir. Siz sadəcə tamaşa seçə və bir qədəh şərabdan həzz ala bilərsiniz. Yaxud “şam yeməyi + şou” variantını seçmək olar. Bu zaman ənənəvi ispan yeməkləri təqdim olunur ki, bu da qastronomiya ilə heyrətamiz tədbiri birləşdirməyə imkan verir. Siz həmçinin Əndəlus mətbəxinin təklif olunduğu rahat restoranda 20-30 avroya şam yeməyi seçə bilərsiniz.

Madrid futbol azarkeşləri üçün

Əgər turistin Madriddə 1-2 gün artıq qalmaq imkanı varsa, onu hələ bir sıra maraqlı yerlər gözləyir. Belə ki, üçüncü gün paytaxtın ən qeyri-adi yerlərindən biri olan Debod məbədində parkda gəzintidən başlaya bilərsiniz. Bu qədim Misir məbədi XX əsrin ortalarında Nubiyadan buraya gətirilib və indi onun sütunları şəhər mənzərəsi fonunda güzgü hovuzlarında əks olunur. Axşama doğru müşahidə meydançasına qalxın və siz ən gözəl günbatımlarından birini görəcəksiniz. Bundan sonra az turistin olduğu məhəllələrə, məsələn, çoxmədəniyyətli mətbəxi, kiçik müasir incəsənət muzeyləri olan rəngarəng Lavapyes rayonuna getmək daha yaxşıdır. Burada şəhər həyatını müşahidə edərək və kiçik qalereya və yerli ustalar mağazalarına baş çəkərək bir neçə saat keçirmək olar.

Nahardan sonra Prado və Reyna Sofia muzeyləri ilə yanaşı, məşhur “incəsənətin qızıl üçbucağı”nın bir hissəsi olan Tissen-Bornemisa Muzeyinə gedin. Vilyaermosa sarayının zallarında italyan intibahından modernizmə qədər, o cümlədən Rubens, Monet və Van Qoqun şah əsərlərini əhatə edən rəsm kolleksiyası təqdim olunur. Bilet 15-20 avroya başa gəlir və burada Pradodan daha sakitdir: rəsmləri izdiham təlaşı olmadan seyr etmək mümkündür.

Axşam saatlarında ənənəvi barları, qədim tavernaları və ailə restoranları olan zərif və rahat məhəlləyə - Çamberiyə baş çəkin. Madridlilər bu yeri sevir, ona görə də burada menyu çox vaxt daha autentik olur: dəniz məhsulları ilə kroketləri, Madrid üsulu ilə bişirilmiş ət və ya mövsümi məhsullarla tapas dadın.

Əgər hələ bir gün qalırsa, paytaxtın 1700 hektardan çox sahəsi olan ən böyük yaşıl zonası Kasa-de-Kampo parkına gedin. Burada qayıqları olan göl, heyvanxana və botanik bağlar var. Bu, təmiz havada bir neçə saat keçirmək, piknik təşkil etmək və ya sadəcə sakitlikdən və şəhər mənzərəsindən həzz almaq üçün ideal bir yerdir.

Əgər futbol azarkeşisinizsə, burada dünya səviyyəli iki klubun – “Real Madrid” və “Atletiko Madrid”in olduğunu yəqin ki, bilirsiniz. “Real”ın doğma meydanı olan “Santiaqo Bernabeu”dan başlayın. Ekskursiya zamanı siz tarixi kuboklarla klubun muzeyini ziyarət edəcək, panoramik müşahidə meydançalarını gəzəcək, soyunma otaqlarını və VIP qonaqların lojalarını görəcəksiniz. Baza bileti 40 avrodur. Əvvəlcədən sifariş etmək daha yaxşıdır, çünki stadion qismən yenidən qurulur və bəzi zonalar bağlı ola bilər.

Daha sonra “Atletiko Madrid”in müasir stadionu olan “Wanda Metropolitano”ya gedin. Tura oyun meydançası, komanda soyunma otaqları zonası, klub muzeyi və kuboklar daxildir. Qiyməti isə böyüklər üçün 19 avrodur. Ziyarəti əvvəlcədən oyun olmayan günlərə planlaşdırmaq daha yaxşıdır. O zaman siz hər şeyi tələsmədən nəzərdən keçirə biləcəksiniz.

Hər iki məkan təkcə stadion divarlarını görmək üçün deyil, həm də böyük klubların ruhunu hiss etmək, tarixə toxunmaq və Madridin futbol sehrinə dalmaq üçün unikal şansdır.

Harada qalmaq? Rayonu və rahatlıq səviyyəsini seçirik

Gecələmək üçün rayon seçimi şəhərdən alınan təəssürata güclü təsir göstərir. Şəhər mərkəzi, xüsusən də Madridin ürəyi olan Puerta del Sol və canlı Qran Via əsas görməli yerləri araşdırmaq və nəqliyyatda vaxta qənaət etmək üçün idealdır. Burada həyat hər zaman qaynayır: çoxlu mağazalar, kafelər və küçə artistləri var, lakin buna görə də səs-küylü ola bilər.

Malasana və Çueka müasir Madridi, gənclər üçün şənlikləri və gecə həyatını görmək istəyənlər üçün uyğun gələcək. Salamanka bahalı hotelləri olan zərif rayon olduğu halda, Lavapies rahat kafeləri və küçə incəsənəti ilə rəngarəng və çoxmədəniyyətlidir.

Hotellərdəki qiymətlər onların səviyyəsindən və mövsümdən asılıdır. Şəhər mərkəzindəki 3 ulduzlu hoteldə iki nəfərlik otaq aşağı mövsümdə gecəsi 120-140 avroya tapıla bilsə də, yüksək mövsümdə onun qiyməti 200 avro və ya daha yüksək ola bilər. 4 ulduzlu hotellər müvafiq olaraq 240 və 300 avroya, lüks servisli 5 ulduzlu hotellər isə 400 avrodan başlayır. Büdcəli səyahətçilər üçün 30-50 avroya hostellər mövcuddur, rahatlıq axtaranlar isə kiçik mənzilləri və ya qısamüddətli mənzilləri seçə bilərlər, burada şəhər mərkəzində gecələmə 90-130 avro, premium seçimlər isə 150-250 avroya başa gəlir. Seçim turistin üstünlüklərindən, qalma müddətindən və rahatlıq və ya əlavə imkanlar üçün ödəməyə hazır olmasından asılıdır.

Yekun abzas

İspaniyanın qəlbinin burada döyündüyünü anlamaq üçün cəmi 48 saat kifayətdir: şərab qədəhlərinin cingiltisi və incəsənət, musiqi və unudulmaz dadlarla əhatə olunmuş köhnə şəhərin daş döşənmiş küçələrində gəzmək arasında. Şəhər öz enerjisi, təzadları və qonaqpərvərliyi ilə dərin təəssürat yaradır, sizi yeni marşrutlar, dadlar və təcrübələr kəşf etmək üçün təkrar-təkrar buraya qayıtmaq istəyinə səbəb olur.