İBİZA ÇAĞIRIR

İbiza haqqında eşidən hər kəs onu həyat bayramı kimi təsəvvür edir. Əksər insanlar üçün adanın adı çimərliklər, əyləncələr, klub mədəniyyəti və sonsuz gecə həyatı ilə assosiasiya olunur. Bu, həqiqətən də, belədir. Amma müəyyən mənada. Bu səs-küyün və əfsanələrin arxasında tarixi və mədəniyyəti ilə zəngin olan əsl, canlı İbiza adası gizlənir. Aralıq dənizində, Balear adaları arxipelağında yerləşən bu ada sanki öz zamanında mövcud olur, İbizada günəş, dəniz və azadlıq böyük şəhərlərin adi həyəcanına xas olmayan harmoniya yaradır. Burada qədim şəhərin dar, daş döşənmiş küçələri, tarixi qalalar, baxış meydançaları, şəffaf suya malik sakit buxtalar, təpələrin gözəl mənzərələri var. İbiza əsrlərin şahididir: qədim finikiyalıların məskunlaşmasından tutmuş romalıların və ərəblərin təsirinə qədər. Əlbəttə ki, ispan memarlığının əzəmətini qeyd etmək lazımdır. Və yalnız klublar və əyləncələr üçün gələnlərin, demək olar ki, hər biri gec-tez İbizanın əsl sehrinin detallarda olduğunu kəşf edir: eyvanlardakı güllərdə, sahildə torlarını təmir edən balıqçılarda, unudulması mümkün olmayan gün batımlarında. Bu ada sadəcə xəritədəki bir yer deyil – bu, hiss edilməsi, küçələrində gəzilməsi, o cümlədən dənizin qoxusunu ciyərlərə çəkməyin və buradakı həyatın ənənəvi təriflərlə izah edilə bilməyən ritmini duymağın lazım olduğu bir haldır.

Adada ilkin addımlar

İbizadan ilk təəssürat təyyarə yavaş-yavaş Aralıq dənizinin parıldayan suları üzərində alçalarkən yaranır, ada tədricən öz konturlarını açır: yaşıl şam ağacları ilə örtülmüş təpələr, ağ binalar, çimərliklər və firuzəyi dəniz. Kiçik, kompakt, lakin qələbəlik olan (xüsusilə mövsümdə) İbizanın aeroportu, bütün dünyadan gələn səyahətçiləri qarşılayır və onun populyarlığı təəccüblü deyil: buraya bütün Avropadan, xüsusilə İspaniya, Böyük Britaniya, Almaniya, İtaliya və Skandinaviyadan turistlər axışır. Yayda aeroport reyslərlə qaynayır, çünki İbiza Aralıq dənizinin ən çox tələb olunan ada kurortlarından biridir. Buraya, demək olar ki, hər hansı bir Avropa paytaxtından gəlmək olar. Madrid və Barselonadan müntəzəm reysləri adanı hətta qısa həftəsonu səyahətləri üçün əlçatan edir, London, Paris və Berlindən çarter reysləri isə günəş və əyləncə həsrətində olanları gətirir.

Təyyarədən endikdən sonra ilk praktik məsələ şəhər mərkəzinə getməkdir. Və burada hər şey sadə və rahat düşünülüb. Hər otuz dəqiqədən bir aeroportdan 10 nömrəli avtobus (3,60 avro) yola çıxır və terminalı İbizanın mərkəzi hissəsi ilə əlaqələndirir. Marşrut şəhərin əsas nöqtələrindən keçir, pəncərədən təpələr, evlər və yaşıl xiyabanlar ötüb keçərkən adanın ritmi və atmosferindən dərhal ilk təəssüratı əldə etməyə imkan verir. Sürət və rahatlığı üstün tutanlar üçün həmişə taksilər mövcuddur, onlar 20 dəqiqə ərzində sizi birbaşa köhnə şəhərə və ya bulvara çatdıracaq (25-35 avro).

“Dalt Vila” əsas simvol kimi

“Dalt Vila” kimi tanınan İbizanın Köhnə Şəhərini onun əsas simvolu - bütün şəhərin üzərində ucalan qala olmadan təsəvvür etmək mümkün deyil. Bu nəhəng qala XVI əsrdə İspaniya kralının göstərişi ilə tikilib. Bu qala adanı o vaxtlar Aralıq dənizi üçün real təhlükə olan quldur basqınlarından qorumaq məqsədilə inşa olunub. Ümumiyyətlə, “Dalt Vila” Avropanın tam şəkildə qorunub saxlanılan az sayda istehkamlarından biridir və onun ziyarəti haqlı olaraq İbizaya hər hansı bir səyahət zamanı “məcburi bənd” sayılır. Daş divarlar, nəhəng bastionlar və möhkəmləndirilmiş qapılar günümüzə qədər qorunub saxlanılıb və onların arasında gəzmək keçmişə əsl səyahətə çevrilir. Onun müşahidə meydançalarına qalxaraq adanın mənzərəsini tam görmək olar: “Dalt Vila”nın dolambac küçələri, qırmızı və terrakota damlar, liman, çimərliklər və xüsusilə gün batımında gözəl görünən sonsuz dəniz.

Gəzinti zamanı qüdrətli qədim Roma heykəlləri ilə qorunan əsas qapıdan “Portal de Ses Taules”dən “Portal Nou”ya qədər olan şəhərin əsas simvollarından yan keçməyin. Qiymətli sənət əsərlərinin, o cümlədən qotik müqəddəs şam qabının saxlandığı XIV əsrə aid kafedral kilsəni də ziyarət edin. Kilsənin qarşısındakı meydanda Arxeoloji muzey yerləşir, bir az uzaqda isə Müqəddəs Dominqo kilsəsi var.

Qaladan aşağıya, “Dalt Vila”nın daş döşənmiş küçələri ilə gəzmək turisti köhnə şəhərin mərkəzinə aparır. Dar küçələr keramika, zərgərlik məmulatları və yerli suvenirlərin satıldığı kiçik bazarlara və dükanlara aparır. Hər döngədə ziyarət ediləsi kilsələrə rast gəlmək olar: burada freskalara baxmaq və bəzən orqan musiqisini eşitmək olar. İbiza Tarix Muzeyi qədim finikiyalılar və Roma məskənlərindən quldur basqınları və İspan qalasının möhkəmləndirilməsi dövrünə qədər artefaktları nümayiş etdirir. Dar küçələrə səpələnmiş müasir incəsənət qalereyaları yerli rəssamların və sənətkarların ənənələrlə müasir formaların vəhdət təşkil etdiyi yaradıcılığını görməyə imkan verir.

Rəngli qapaqları, dəmir məhəccərli eyvanları və güllərlə örtülü pəncərələri olan köhnə evlər təkrarolunmaz ab-hava yaradır. Burada asta-asta, hər detalı nəzərdən keçirərək, ən yaxşı rakurslardan fotolar çəkərək və gizli guşələrə baxaraq gəzmək istəyirsən.

Turist köhnə şəhərdəki təpədən aşağı düşdükdən sonra bütün sahil boyu uzanan və köhnə limanı istirahətin müasir zonaları ilə birləşdirən bulvara çıxır. Burada İbiza tamamilə fərqli görünür: “Dalt Vila”da tarixin nəfəsi hiss olunursa, bulvarda müasir adanın ritmi, onun həyatı və enerjisi hiss olunur. Sahil boyunca gəzmək limanlarda lövbər salmış çoxsaylı yaxtaların mənzərəsindən həzz almağa imkan verir, şəhərin ağ və qırmızı damlarının sakit suda əksi təkrarsız mənzərə yaradır.

Bulvar bir neçə kilometr uzanır. Bulvar boyunca dəniz mənzərəli kafe və restoranlar yerləşir, burada təzə dəniz məhsullarını, tapasları dadmaq və ya sadəcə bir fincan qəhvə içmək olar.

İbiza limanı təkcə qastronomiya və alış-veriş mərkəzi deyil, həm də adanın dənizlə qarşılıqlı əlaqəsinin canlı nöqtəsidir. Burada ən müxtəlifölçülü yaxtalar – kiçik gəzinti katerindən tutmuş dəbdəbəli gəmilərə qədər – lövbər salır. Bulvar boyu piyada gəzmək rahatdır: bütün liman boyu gəzərək qayıqların hərəkətini, turistlərin və yerli sakinlərin səs-küyünü müşahidə etmək olar. Sahil xəttinin bəzi hissələrində dayanaraq panoramik mənzərələrdən zövq ala biləcəyiniz skamyalar və müşahidə nöqtələri var.

Çimərlik cənnəti və Aralıq dənizi təamları

İbizanın çimərlikləri haqlı olaraq bütün dünyadan turistlərin diqqətini cəlb edir. Onların arasında ən məşhuru limandan cəmi 20-25 dəqiqəlik piyada məsafədə yerləşən “Talamanka” çimərliyidir. O, yayda əsl çimərlik həyatının mərkəzinə çevrilir: qızılı rəngdə qum, şəffaf firuzəyi su, çətirlər və şezlonqlar, sahil boyunca isə sərinləşdirici kokteyllər, təzə dəniz məhsulları və yüngül qəlyanaltılar təklif edən bar və restoranlar sıralanır.

“Bossa Beach” və “Ses Salines” kimi İbizanın digər çimərlikləri gənclər və aktiv istirahət həvəskarları arasında məşhurluğu ilə tanınır. Yayda burada əyləncələr təşkil olunur, açıq havada klublar fəaliyyət göstərir, həmçinin kayak və avarçəkmədən tutmuş paraşüt və qayıq icarəsinə qədər su idman növləri mövcuddur. “Ses Salines” uzun qum zolaqları, qum təpələri və sakit laqunları, həmçinin musiqi həvəskarlarını və məşhurları cəlb edən klub atmosferi ilə məşhurdur.

Amma soyuq mövsümdə vəziyyət dəyişir. Çimərliklər fəaliyyət göstərir, amma daha sakit rejimdə. Həmin mövsümdə çətirlər və şezlonqlar yığışdırılır, dənizdə isə yalnız ən dözümlü insanlar çimə bilər. Lakin soyuq mövsümdə digər sevincli anları yaşamaq olar: sahil boyu gəzintilər, dalğaları müşahidə etmək, foto çəkmək və sahil restoranlarında tələsmədən nahar etmək və ya qəhvə içmək. Məhz qışda turist izdihamı olmadan adanın təbii gözəlliyini hiss etmək, sakitlikdən zövq almaq və sahilin hər santimetrini nəzərdən keçirmək mümkündür.

Əgər turistlərin çox olmadığı, adanın əsl atmosferini hiss edə biləcəyiniz, sakitlikdə gəzə biləcəyiniz və İbizanı parlaq səyahət bələdçilərində nadir hallarda göstərildiyi kimi görə biləcəyiniz bir İbiza guşəsi tapmaq istəyirsinizsə, bu, “Cala d'Hort” çimərliyidir. Ağ quma, təmiz suya malik olan kiçik çimərlikdən məşhur, qayalı Es-Vedra adasına mənzərə açılır. Yayda buraya təbiət və təkliyə üstünlük verənlər gəlir, qışda isə burada boşluq olur, yalnız dalğaların və küləyin səsi eşidilir ki, bu da gəzintini, demək olar ki, meditativ edir. Turistlər üçün vacib qeyd: burada infrastruktur, demək olar ki, yoxdur – özünüzlə su və çimərliyə gedən cığırdan enmək üçün rahat ayaqqabı götürmək daha yaxşıdır.

Digər gizli guşələr – adanın şimal-şərqində “San Miguel” və “San Jose” kimi kiçik kəndlərdir. Burada ənənəvi ağ evləri, dar küçələri görmək və demək olar ki, turistlərin olmadığı kiçik kafelərdə yerli mətbəxin yeməklərini dadmaq olar. Burada ev pendirləri, bal və ada istehsalı olan şərablar satılan kənd təsərrüfatı bazarları təşkil olunur. Bu, səyahətçi üçün çimərlik və klub sənayesi ilə əlaqəli olmayan İbizanın həqiqi həyat ritmini hiss etmək imkanıdır.

İbiza təkcə çimərlikləri və klubları ilə deyil, həmçinin Aralıq dənizi ənənələrinin müasir kulinariya trendləri ilə yanaşı olduğu qastronomiyası ilə də məşhurdur. Sahil restoranlarına xüsusi diqqət yetirmək lazımdır. Məsələn, terrasları olan restoranlar “Talamanka”da sahil boyunca yerləşir. Həmin restoranlarda dənizə baxaraq nahar etmək imkanı əldə edəcəksiniz. Yayda bu restoranlar turistlərlə dolu olur. Burada hava musiqi sədaları altında təzə balıq, dəniz məhsulları və yerli bağdan gələn otların ətirləri ilə dolur. Təzə dəniz məhsullarından hazırlanan yeməklər məşhurdur: qrildə kalmarlar (15-18 avro), kartofla bişirilmiş səkkizayaqlı ilbiz (18-22 avro), sarımsaq souslu krevetlər (16-20 avro), həmçinin məşhur dəniz məhsullu paelya - özbək plovu kimi, iki və ya üç nəfərə verilir (28-35 avro).

Dəniz məhsullarından əlavə İbiza restoranlarında yerli delikatesləri də dadmaq olar: Mahon pendiri (porsiyası 6-10 avro), xamon, zeytun, pomidor və anşuz ilə tapaslar (10-15 avro), adada yetişdirilmiş təzə tərəvəzlər və “Ensaïmada” kimi şirniyyatlar – şəkər tozu ilə yumşaq qatlı bulka (3-5 avro). Bir çox kafelər ev çörəkləri, meyvələr və təzə sıxılmış şirələrlə (10-15 avro) səhər yeməkləri və branç təklif edir ki, bu da səhər bulvar boyu gəzintini daha da xoşagələn edir.

Gecə İbizasının sirləri

Fakt odur ki, son onilliklərdə İbiza Aralıq dənizinin ən çox ziyarət edilən adalarından biridir. Hər il buraya 3 milyondan çox turist gəlir, onların böyük hissəsi çimərlik istirahətini əyləncələr və musiqi hadisələri ilə birləşdirmək istəyən gənclər və aktiv istirahət həvəskarlarıdır. İbiza çimərlikləri çoxdan yay istirahətinin simvoluna çevrilibsə, adanın gecə həyatı onun populyarlığının ikinci, az əhəmiyyətli olmayan səbəbi olub. Klublar, əyləncələr və musiqi festivalları hər yerdən turistləri cəlb edərək, gecə İbizasını əfsanəvi edir.

Ən məşhur klublardan biri 1973-cü ildə açılan “Pacha”dır. O, gecə İbizasının simvoluna çevrilmiş, beynəlxalq DJ-lər, tematik əyləncələr və zalların müxtəlifliyi ilə tanınır. Giriş həftənin günü və proqramdan asılıdır: adətən, bilet 50-dən 100 avroya qədər olur, mövsümdə isə populyar əyləncələr üçün onlar bir neçə həftə əvvəldən satılır. Burada dres-kod tətbiq olunur: dəbli və səliqəli geyim alqışlanır, idman ayaqqabıları və çimərlik geyimləri uyğun deyil.

Digər bir əfsanəvi klub isə “Amnesia”dır. Məşhur köpük əyləncələri və möhtəşəm işıq şouları ilə tanınır. Giriş haqqı axşamdan asılı olaraq 40-dan 90 avroya qədər dəyişir, mövsümi şoular isə daha baha ola bilər. “Playa d'en Bossa” çimərliyində yerləşən “Ushuaïa” klubu isə gündüz və axşam əyləncələrini birləşdirir. O, açıq səhnələri, hovuzları və bayrama tam dalma effekti yaradan işıq qurğuları ilə məşhurdur. Biletlər 60-120 avro edir, lakin VIP zonalar və masaların rezervasiyası qiyməti bir neçə yüz avroya qaldıra bilər. Daha bir məşhur və nisbətən yeni klub isə “Hï Ibisa”dır. O, müasir memarlığı, yüksək səs standartları və DJ-lərin eksklüziv setləri sayəsində tez populyarlıq qazanıb. Giriş bileti 50-80 avrodur, bəzi tədbirlər zamanı isə 150 avroya qədər ola bilər.

Əksər klublar gecə yarısından sonra açılır və erkən səhərə qədər işləyir. Yayda onlar doludur, ona görə də biletləri əvvəlcədən onlayn almaq və ya masaları rezerv etmək lazımdır. Qışda aktivlik azalır, bir çox klublar bağlanır və ya məhdud rejimdə işləyir, lakin onların bir neçə böyüyü bayramlarda və həftə sonları əyləncələr təşkil etməyə davam edir.

İbiza kasıblar üçün deyil

İbizada hər zövqə uyğun yaşayış yeri var: hostellərdən tutmuş 5 ulduzlu hotellər və bahalı mənzillərə qədər. Lakin qiymətlər, əlbəttə ki, yüksəkdir. Belə ki, yay üçün ən ucuz variantlar səhər yeməyi olmadan iki nəfər üçün 100-110 avrodan başlayır. İbiza standartlarına görə şərti olaraq “orta” hesab edilən 3 ulduzlu hotellərdə otaqlar 200-300 avro, 4 ulduzlu 400-dən, 5 ulduzlu isə 500 avrodan başlayır. Yüksək mövsümdə birhəftəlik mənzil kirayəsi kifayət qədər baha ola bilər: mərkəzi rayonlarda və ya dəniz kənarında mənzil üçün qiymətlər həftəsinə 3300 avro və daha yüksəyə qalxır. Hətta bir günü 3-4 min avroya başa gələcək rahat villalar var.

Vacib olan odur ki, qiymətlər mövsümdən, mərkəzdən-çimərlikdən uzaqlıqdan, şəraitdən və siz yeri nə qədər əvvəl rezerv etməyinizdən çox asılıdır. İbizada mövsüm yaydır və məhz bu vaxt qiymətlər kəskin şəkildə artır. Mövsümarası dövrdə (payız-qış – təxminən oktyabrdan aprelə qədər) vəziyyət dəyişir: bir çox hotellər ya bağlanır, ya da məhdud servislə işləyir. Və müvafiq olaraq, qalma qiymətləri əhəmiyyətli dərəcədə aşağıdır: 50-60%. Beləliklə, əgər hədəfiniz sakit istirahət, gəzintilər, aralıq mövsümdə dəniz və turist kütlələri olmadan istirahətdirsə, qış-payız mövsümü daha çox azadlıq verə və daha az büdcəli ola bilər.

Bir sözlə, İbiza tarix və müasirliyin, sakit çimərliklərin və gurultulu gecə həyatının birləşdiyi kontrastlar adasıdır. Köhnə şəhər sizi keçmişin atmosferinə qərq edir, bulvar, limanlar və çimərliklər isə adanın canlı müasir tərəfini açır. İbizanın əsas cəzbedici xüsusiyyətləri milyonlarla turisti cəlb edən çimərliklər və əfsanəvi klublar olaraq qalır. Lakin adanın gizli guşələri, kiçik kəndləri və təkliyə çəkilə biləcək buxtaları İbizanı səyahət bələdçilərinin nadir hallarda göstərdiyi kimi görməyə imkan verir.