
"BU, ADİ POPULİZMDİR"
Leonid Radzixovski: "Miqrasiya haqqında qanuna təklif olunan yeniliklər Rusiyada işləməyəcək"
Müəllif: Ceyhun NƏCƏFOV Bakı
Rusiya hökuməti miqrasiya siyasətinin sərtləşdirilməsi məsələsinə yenidən qayıdıb. Məsələn, prezident Vladimir Putin Federal Miqrasiya Xidmətinin 2015-ci ildən xarici dövlətlərin vətəndaşlarının Rusiyaya yalnız xarici pasportla buraxılması təklifini dəstəkləyib. Bir müddət əvvəl isə Dövlət Dumasının Kommunist Partiyası və Liberal-Demokrat Partiyasından olan deputatları Qırğızıstan, Tacikistan və Özbəkistandan olan miqrantlara viza rejiminin tətbiqi təklifi ilə çıxış ediblər. Rusiyanın miqrasiya siyasətini sərtləşdirməsinin onun MDB ölkələri ilə siyasi, iqtisadi və beynəlxalq münasibətlərinə necə təsir göstərəcəyi ilə bağlı rusiyalı politoloq Leonid RADZİXOVSKİ ilə söhbətləşdik.
- Rusiya hökumətinin bu gün atdığı addımları anlamaq çətindir: Rusiyanın əmək miqrantlarına ehtiyacı var, ya yox?
- Rusiyaya üz tutan miqrantların əksəriyyəti Mərkəzi Asiya ölkələrini təmsil edir. Onlar, əsasən, Tacikistan, Özbəkistan və bir qədər də Qırğızıstandan gəlirlir. Bildiyimə görə, Azərbaycandan Rusiyaya yeni miqrant axını çox cüzidir. Miqrasiya siyasətinin sərtləşdirilməsinin Azərbaycana birbaşa aidiyyəti yoxdur.
Bu miqrantların qarşısında Rusiyaya yalnız xarici pasportla gəlmək şərti qoyulacaqsa, onlar sadəcə Rusiyaya gəlməyəcəklər. Rusiyada əməkhaqqı yüksək deyil, miqrantların həyat və iş şəraiti ağırdır. Doğrudur, miqrantların müəyyən dərəcədə bildikləri rus dili amili də var. Amma bu, çözülməsi mümkün olan məsələdir. Koreya Respublikasında, Cənub-Şərqi Asiyada, Fars körfəzi ölkələrində, Avstraliyada Rusiyadakından daha çox pul qazanmaq olar. Yəni, Rusiyaya miqrant axını əvvəlcə tədricən, sonradan isə sürətlə azalmağa başlayacaq. Qastarbayterlərsiz Rusiya iqtisadiyyatı mövcud ola bilməz. Bütünlükdə inşaat sahəsində, kommunal xidmətlərdə, ağır fiziki əməkdə qastarbayterlər işləyir. Ruslar, ukraynalılar və belaruslar eyni pula bu işləri görmürlər. Əməkhaqqının artırılması isə tikintidə, həmçinin kommunal sahədəki xidmətlərin maya dəyərinin kəskin şəkildə artmasına səbəb olacaq. Mən hələ Rusiya məmurlarının qastarbayterlər vasitəsilə qazandıqları külli miqdarda məbləğlərdən danışmıram. Məsələn, qastarbayterlərə Rusiyada maşın almaq icazəsi verilmir. Onların taksi sürücüsü kimi işləməsi üçün icarəyə götürdükləri maşınların sahibləri isə məmurlardır. Eyni sözü Moskva və digər şəhərlərdə miqrantlara kirayə verilən mənzillərlə də bağlı söyləmək olar. Bu gün Rusiyada fantastik məbləğdə pulu yalnız qastarbayter əməyi sayəsində qazanmaq mümkündür.
Beləliklə, bu gəlir mənbəyinin ləğvi Rusiyanın hakim sinfinin iqtisadi və maddi maraqlarına zərbə vurulması olardı. O üzdən də düşünürəm ki, miqrasiya qanununa yeni dəyişikliklərlə bağlı təkliflər işləməyəcək. O, müntəzəm surətdə pozulan, əməl olunmayan, daim hansısa dəyişikliklərin, əlavələrin və sairin edildiyi qanunlardan birinə çevriləcək. İstənilən halda, yeni qaydalar tam gücü ilə işləməyəcək.
- Moskvanın miqrasiya siyasətini sərtləşdirməsi Mərkəzi Asiya ölkələrini Gömrük İttifaqına, daha sonra isə Avrasiya İttifaqına itələyə bilərmi? Axı Belarus və Qazaxıstan üçün Rusiyanın sərhədləri tam açıq qalacaq...
- Rusiya hökumətinin miqrasiya siyasəti üzündən Tacikistan, Özbəkistan və Qırğızıstanın Gömrük İttifaqına qoşulmaları Rusiya üçün öldürücü olardı. Məsələ ondadır ki, bu Mərkəzi Asiya ölkələri Gömrük İttifaqına elə-belə qoşulmayacaqlar. Onların maddi və iqtisadi yardıma ehtiyacları olacaq, Rusiya isə bu yardımı göstərə bilməz. SSRİ-nin istənilən formatda bərpası Rusiya üçün faciəvi nəticələr verər. Mərkəzi Asiya regionunun inkişafı Rusiya üçün qaldırılması mümkün olmayan yükdür. Bu üç ölkənin əhalisi birlikdə, təxminən, 50 milyondur. Rusiyada isə 140 milyon əhali var. Moskvanın bu ölkələri iqtisadi, sosial baxımdan ayağa qaldırması sadəcə mümkün deyil.
- Bunu Qırğızıstan, Ukrayna və Azərbaycanın Rusiya obyektlərinə görə icarə haqqını qardırmasına Kremlin cavabı saymaq olarmı?
- Düşünürəm ki, bu, adi populizmdir. Rusiya əhalisi miqrantlara nifrət edir. Səbəb də müəyyən dərəcədə bundadır. Yadlara hər tərəfdə nifrət var, müəyyən dərəcədə ölkədəki problemlərə görə miqrantlar günahlandırılır, kriminal statistikaya görə də onlar sevilmir və sair. Hakimiyyət də zaman-zaman rus insanının qayğısına qaldığını göstərməyə çalışır. Nə qədər paradoksal olsa da, evini qırğıza satan pensiyaçı özbək qastarbayterin tikdiyi mənzildə yaşayır, tacikin süpürdüyü küçədə gəzir, amma onlara nifrət edir. Həmin pensiyaçını miqrantların rus dilini bilməməsi, onun isə miqrantları başa düşməməsi qəzəbləndirir. O, öz şəhərində yadlardan qorxur. Bir sözlə, nə qədər ki, Yer kürəsində insanlar var, ksenofobiya da olacaq. Hakimiyyət isə hansısa şəkildə bu vəziyyətlə oynamağa çalışır. Hər halda, hələ ki, miqrantlar üçün şərtlərin ağırlaşdırılmasına başqa izah yoxdur.
- Rusiya Dövlət Dumasının bəzi deputatlarının təklif etdikləri kimi, Belarus və Qazaxıstandan başqa, Rusiya MDB ölkələrinin hamısı ilə viza rejimi tətbiq etsə necə olacaq? Hazırda hər kəsə bəlli olan səbəblərdən yalnız Gürcüstanla viza rejimi qüvvədədir...
- Bunun siyasi təzyiq vasitəsi kimi gerçəkləşdirilməsi tamamilə mümkündür. Amma o, yalnız hansısa konkret siyasi məqsədlərə nail olmaq üçün qısamüddətli siyasət kimi həyata keçirilə bilər. Uzunmüddətli siyasət kimi bu vasitəyə əl atılması mümkün deyil. Çünki bu halda ölkəyə miqrant axını tam kəsiləcək. Gürcüstanla bunu etmək asan idi. Çünki gürcülər tikintidə, kommunal xidmət sahələrində işləmirdilər. Gürcü miqrantlar Rusiya iqtisadiyyatına heç nə vermirdilər və bu üzdən ölkənin onlara ehtiyacı yoxdur. Gürcüstan və ya Baltikyanı ölkələrlə viza rejiminin olması Rusiya üçün təhlükəli deyil. Mərkəzi Asiyadan olan işçi qüvvəsi isə fərqli məsələdir.
Azərbaycana gəlincə, bir qrup azərbaycanlı miqrantın artıq vətənlərinə qayıtmaq istədiklərini bilirəm. Bəziləri ailəsinin, işinin və s. olduğu Rusiyada yaşamaq istəyir. Son zamanlar mən Rusiyaya 1-2 il əvvəl gəlmiş azərbaycanlı miqrantlarla rastlaşmıram. Buradakılar, əsasən, 15-20 il öncə gələnlərdir. Bu da təbiidir. Çünki Azərbaycanda sabit iqtisadi vəziyyət hökm sürür. İndi əvvəlki kimi sürətli iqtisadi inkişaf olmasa da, artım yenə də davam edir. Belə olan təqdirdə, insanlar hər şeyi ataraq hansısa başqa ölkəyə nədən üz tutsunlar? Odur ki, Rusiyanın miqrasiya siyasətini sərtləşdirməsinin ən az aidiyyəti olacaq ölkə Azərbaycandır. Bu, Mərkəzi Asiya üçün real problemdir. Bu, qorxutmaq üçün və ya birdəfəlik təzyiq kimi mümkündür. Daimi siyasət kimi isə, bunu tamamilə absurd sayıram.
MƏSLƏHƏT GÖR: